په مسقط کې به په څو شېبو کې د تهران او واشنګټن ترمنځ خبرې پيل شي
له واشنګټن سره د خبرو لپاره د عباس عراقچي په مشرۍ ایراني پلاوی د عمان مرکز مسقط ته رسېدلی او په څو شېبو کې به خبرې اترې پيل شي. عراقچي د خبرو تر پیلېدو وړاندې د عمان د بهرنیو چارو له وزیر بدر البوسعیدي سره هم لیدلي دي.
ایران وایي، چې خبرې به د ملي ګټو، عادلانه تفاهم او د دواړو لورو د منلو وړ حل په موخه ترسره شي. سپینې ماڼۍ بیا ویلي، چې ولسمشر ټرمپ له ایران سره د هوکړې امکان څېړي او خبرې به پر ډیپلوماسۍ متمرکزې وي. د امریکایي پلاوي مشري د ټرمپ استازی وېټکاف او کوشنر کوي.
دغه خبرې د تهران او واشنګټن ترمنځ د څو اونیو زیاتېدونکي تاوتریخوالي او د پوځي نښتو تر اندېښنو وروسته ترسره کېږي.
په مسقط کې د امریکا سره د خبرو اترو له پیل څخه شاوخوا یو ساعت مخکې د ایران د بهرنیو چارو وزیر عباس عراقچي پر اېکس پاڼه لیکلي و، چې تهران به د تېر کال پېښو له هېرولو پرته مذاکراتو ته کېني.
