ملګرو ملتونو د پاکستان په پلازمېنه کې پر جومات برید په سختو ټکو وغانده
د ملګرو ملتونو سرمنشي انتونیو ګوترېش د پاکستان په پلازمېنه اسلاماباد کې پر شعیه لمونځ کوونکو برید په سختو ټکو غندلی او وايي، چې پر ملکي وګړو او عبادت ځایونو بریدونه په هېڅ ډول د منلو وړ نه دي.
د ملګرو ملتونو د سرمنشي د ویاند لهخوا په خپره شوې اعلامیه کې د یاد سازمان د سرمنشي له قوله لیکل شوي، چې پر ملکي وګړو او عبادت کوونکو باندې بریدونه په هېڅ صورت د منلو وړ نه دي او ټینګار یې کړی، چې د یاد برید مسوولین باید وپېژندل شي او د قانون منګولو ته وسپارل شي.
انتونیو ګوترېش په اسلاماباد کې د ځانمرګي برید د قربانیانو له کورنیو سره خپله خواخوږي څرګنده کړې او د ترهګرۍ پر وړاندې مبارزې برخه کې یې د پاکستان له حکومت او خلکو سره د ملګرو ملتونو پر ملاتړ ټینګار کړی دی.
په اسلاماباد کې د شیعهګانو پر جومات ځانمرګي برید کې ۳۱ شیعه لمونځ کوونکي وژل شوي او ۱۶۹ نور ټپیان شوي دي.
د یاد برید پړه تر اوسه کومې وسلهوالي ډلې پر غاړه نه ده اخیستي.
