په اسلاماباد کې د شیعهوو په یوه جومات کې چاودنې ۳۱ تنه وژلي او ۱۶۹ نور ټپیان دي
د اسلام اباد مرستیال کمېشنر منلې، چې په اسلام اباد کې د شیعهوو پر یو جومات کې چاودنې ۳۱تنه وژلي او ۱۶۹ نور ټپیان دي. هغه زیاتوي چې پېښه ځانمرګي برید ته ورته ښکاري. دا برید د جمعې د لمانځه پر مهال د اسلاماباد د خدیجه کبرا په جومات کې شوې ده.
د اسلام اباد مرستیال کمېشنر تقي جواد دا مرګژوبله تاید کړې او د پلازمېنې اسلام اباد په دولتي روغتونونو کې بېړنۍ حالت رامنځته شوی دی.
د پاکستان پولیسو نن د جمعې په ورځ خبر ورکړی، چې د اسلاماباد په شهباز ټاون کې د شیعهګانو پر یوه جومات کې چاودنه شوې ده.
تر اوسه پورې د برید مسوولیت کومې وسلوالې ډلې په غاړه نه دی اخیستی؛ خو له دې وړاندې د شیعهوو پر جوماتونو د بریدونو مسوولیت د داعش خراسان ډلې په غاړه اخیستی دی.
د پاکستان ولسمشر اصف علي زرداري دا چاودنه غندلې او ویلي یې دي چې «بې ګناه وګړي په نښه کول د انسانیت پر وړاندې جرم دی.»
ولسمشر په یوه بیان کې وویل چې ملت د سختۍ په دغه شېبو کې د اغیزمنو کورنیو سره ولاړ دی. ولسمشر لارښوونه کړې چې ټپیانو ته ټولې ممکنه طبي اسانتیاوې برابرې شي.
