په خوست کې د طالبانو د امنیه قوماندانۍ ویاند طاهر احرار خبر ورکړی، چې تېره شپه د دغه ولایت د مرکز اړوند ازادۍ مېنه کې په یوه کور کې د ګاز ډبې چاودنې له امله درې ښځې مړې شوې او یو ځوان ټپي دی.
نوموړي ویلي، چې تر پېښې وروسته سیمې ته د اور وژنې ډله رسېدلې او د نور زیان مخه یې نیولې. د هغه په وینا؛ د پېښې قربانیان ټول د یوې کورنۍ غړي دي.
د هرات ځايي اوسېدونکي وايي، چې د تېز باد او سخت توپان له امله ونې ماتې شوې چې له امله یې یو کس مړ او یو بل ټپي شوی دی. پېښه تېره ورځ د هرات په انجیل ولسوالۍ کې رامنځته شوې ده.
سرچینو ویلي، چې تېره ورځ په هرات کې سخت توپان، تېز باد او ږلۍ شوې چې د ونو ماتېدو ترڅنګ یې کرنیزې ځمکې او ګلخانې هم زیانمنې کړې دي.
له بل پلوه په فراه کې د طالبانو د امنیې قوماندانۍ ویاند ننګیال فراهي ویلي، چې د دغه ولایت د فراهرود ولسوالۍ په ګورزنګ سیمه کې د باران له امله د یوه کور چت پرېوتو په پېښه کې د یوې نجلۍ په ګډون دوه کسان مړه او یوه بله مېرمن او دوه ماشومان سخت ټپیان شوي دي.
دا په داسې حال کې ده، چې د طالبانو د هواپوهنې ادارې نن د افغانستان په شلو ولایتونو کې د درنې واورې، تیزو بادونو او بارانونو اټکل کړی دی. ورته مهال د درنې واورې او توپان له امله د سالنګ، بامیان او دایکنډي لارې هم تړل شوې دي.
د طالبانو تر واک لاندې د کډوالو ستونزو ته د رسېدنې کمېسیون وایي، چې د پنجشنبې په ورځ له پاکستان او ایران نه ۶۷۹ کډوالې کورنۍ افغانستان ته ستنې شوې دي. یاد کمېسون ویلي، چې دغه کورنۍ د نیمروز، هرات، کندهار او ننګرهار له لارو افغانستان ته ستنې شوې دي.
د طالبانو یاد کمېسیون په یوه خبرپاڼه کې ویلي، چې پرون د نيمروز د ورېښمو پله لارې ۱۲، د هرات د اسلام کلا له لارې ۲۲، د کندهار د سپين بولدک له لارې ۱۲۹ او د ننګرهار د تورخم له لارې ۵۱۶ کورنۍ افغانستان ته ستنې شوې دي.
تازه د طالبانو د کډوالو او بېرته راستنېدونکو چارو وزارت خبر ورکړی، چې په تېرو درېیو میاشتو کې نږدې ۹۴زره کډوالې کورنۍ له ایران، پاکستان او ترکیې نه افغانستان ته ستنې شوې دي. د دغه وزارت په وینا؛ په دغه موده کې ۲۵۴زره او ۲۱۸ کسان له کورنیو پرته په جبري توګه ستانه کړای شوي دي.
د طالبانو د کډوالو او بېرته راستنېدونکو چارو وزارت زیاته کړې، چې په ورته موده کې ۳زره او ۶۴۸ بندیان د پاکستان له بېلابېلو زندانونو خوشې شوي دي. د یاد وزارت ویاند عبدالمطلب حقاني وایي، له دې ډلې ۸۸زره او ۲۳۱ کورنۍ له پاکستان نه، ۵زره او ۳۱۰ کورنۍ له ایران او ۳۹ کورنۍ له ترکیې ستنې شوې دي.
په فراه کې د طالبانو د امنیې قوماندانۍ ویاند ننګیال فراهي ویلي، چې د دغه ولایت د فراهرود ولسوالۍ په ګورزنګ سیمه کې د باران له امله د یوه کور چت پرېوتو په پېښه کې د یوې نجلۍ په ګډون دوه کسان مړه او یوه بله مېرمن او دوه ماشومان سخت ټپیان شوي دي.
ننګیال فراهي وايي، چې د پېښې ټپیان د یادې ولسوالۍ روغتیايي مرکز ته لېږدول شوي دي. په افغانستان کې درنو واورو او بارانونو په یو شمېر نورو سیمو کې هم ځاني او مالي زیانونه اړولي دي.
دا په داسې حال کې ده، چې د طالبانو د هواپوهنې ادارې نن د افغانستان په شلو ولایتونو کې د درنې واورې، تیزو بادونو او بارانونو اټکل کړی دی. له بل پلوه د درنې واورې له امله د سالنګ، بامیان او دایکنډي لارې هم تړل شوې دي.
د طالبانو د ټولګټو چارو وزارت ویاند وايي، چې د سالنګ لاره د پنجشنبې په ورځ شاوخوا پنځه بجې د درنې واورې، توپان او د لید کچې کمېدو له امله د تګراتګ لپاره تړل شوې ده. هممهاله په بامیان او دایکنډي کې د طالبانو ځایي چارواکو په دغه ولایتونو کې د یوشمېر لارو د تړلو خبر ورکړی.
د روسیې دولتي خبري اژانس «ټاس» راپور ورکړی، چې په ۲۰۲۵کال کې په دغه هېواد کې د لنډمهاله پناهغوښتنې د غوښتونکو شمېر د پام وړ زیات شوی. د راپور له مخې؛ له اوکراین او سوریې وروسته افغانان په دغه هېواد کې د پناهغوښتنې درېیم لوی شمېر جوړوي.
دغه راپور چې د پنجشنبې په ورځ (د سلواغې ۱۶مه) خپور شوی پهکې راغلي، چې په ۲۰۲۵کال کې ۲۸۱ افغانانو په روسیه کې د لنډمهالې پناهغوښتنې غوښتنه کړې ده. راپورونه ښيي، چې په تېرو څلورو کلونو کې په روسیه کې د ډېرو افغانانو د پناهغوښتنې غوښتنلیکونه رد شوي دي.
د نوملړ په سر کې اوکراین راغلی، چې ۳زره او ۳۳۲ وګړو یې د کډوالۍ غوښتنه کړې، سوریه دویم ځای لري چې ۳زره او ۱۹۶ وګړو یې په روسیه کې د لنډمهالې پناهغوښتنې غوښتنه کړې ده.
په راپور کې راغلي، په ۲۰۲۵کال کې په ټولیزه توګه ۸زره او ۲۲۰ بهرنيو وګړو د روسیې د لنډمهالې پناهغوښتنې لپاره غوښتنه کړې ده چې د ۲۰۲۴کال پرتله ۱۳۴۱ زیاتوالی ښيي.
له افغانستان وروسته د ازبکستان ۱۷۶ وګړو او د جرمني ۱۲۹ وګړو د غوښتنو سره په څلورم او پنځم ځایونو کې راځي. د ځینو اروپایي هېوادونو وګړي هم د بېلابېلو لاملونو له امله په روسیه کې د دغه ډول اوسېدو غوښتونکي دي.
په وروستیو کلونو کې روسیې هڅه کړې، چې د بهرني کاري ځواک جذب زیات کړي او په ځینو سیمو کې د انساني ځواک کمښت، په ځانګړې توګه په صنعتي او خدماتي برخو کې د دغه هېواد د کډوالو د منلو هڅه لا پیاوړې کړې ده.
د یونان خیوس ټاپو ته نږدې د پناهغوښتونکو د لېږد یوه چټکه کښتۍ د یونان د ساحلي ګارډ له بېړۍ سره ټکر شوې، چې له امله یې شاوخوا ۱۵ کسان مړه شوي دي. د راپورونو له مخې؛ په دغه کښتۍ کې ډېری سپاره کسان افغان کډوال وو.
په یادې پېښه کې شاوخوا ۲۵ نور کډوال چې اووه نارینه، اووه ښځې او ۱۱ ماشومان وو، ژغورل شوي دي. د یونان ساحلي ګارد په یوه خبرپاڼه کې ویلي، دغه پېښه هغه مهال رامنځته شوه چې د دوی د ګزمې بېړۍ د شپې د ماموریت پر مهال یوه کښتۍ ولیده چې د سمندري تګ لپاره یې څراغونه نهلرل او د خیوس ټاپو ختیځو ساحلو ته روانه وه.
د ساحلي ګارد د راپور له مخې؛ د پناهغوښتونکو کښتۍ د درېدو لپاره د دوی خبرداریو ته پام ونه کړ او ناڅاپه یې خپله لاره بدله کړه، چې د ګزمې کښتۍ د ښي برخې سره ټکر شوه. د یونان دولتي ټلوېزیوني شبکې راپور ورکړی، په ټولیز ډول ۲۵ پناهغوښتونکي چې اووه نارینه، اووه ښځې او ۱۱ ماشومان پهکې شامل دي ژغورل شوي؛ خو ۱۴ کسان بیا مړه شوي او یوې بلې ښځې روغتون ته تر لېږد وروسته د سختو ټپونو له امله ساه ورکړې ده.
د یونان ساحلي ګارد ویلي، د ورکو شویو کسانو د موندلو لپاره د لټون او ژغورنې عملیات لا هم روان دي. عیني شاهدانو د کښتۍ د سپرو شمېر شاوخوا ۳۰ تر ۳۵ کسانو پورې اټکل کړی دی.