ټېلګراف ورځپاڼې په یوه ځانګړي راپور کې افشا کړې، چې روسیې په ۲۰۱۸ کال کې پر تهران باندې د امریکا د بندیزونو له زیاتېدو سره سم، دوه نیم میلیارده ډالره نغدې پیسې په پټه توګه ایران ته لېږدولې دي.
برېتانیایۍ ټېلګراف ورځپاڼې د جمعې په ورځ (د سلواغې ۱۷مه) په دغه ځانګړي راپور کې لیکلي چې، د روسیې یوه دولتي بانک په ۲۰۱۸ کال کې د امریکا د هغه وخت د ولسمشر ډونالډ ټرمپ لهخوا پر تهران باندې د سختو بندیزونو د بېرته لګولو د اجراییوي فرمان له لاسلیک کېدو یوازې څو ورځې وروسته، ایران ته د بانک نوټونو د لویو جوپو لېږل پیل کړل.
د دغه راپور پر بنسټ، د دې لېږدونو ټولییز ارزښت شاوخوا ۲.۵ میلیارده ډالره و چې د څلورو میاشتو په ترڅ کې د لسګونه جوپو په بڼه ترسره شول او د ټولو وروستۍ موخه په تهران کې د ایران مرکزي بانک و.
دغه راپور په داسې حال کې خپور شوی، چې د واشنګټن او تهران ترمنځ د خبرو اترو په چوکاټ کې د عمان ناسته وشوه؛ هغه ناسته چې د دغه هېواد په منځګړیتوب جوړه شوې او تر اوسه یې د پایلو په اړه جزییات نه دي اعلان شوي.
