د افغانستان د کرېکټ ملي لوبډله د ۲۰۲۶ کال د شل اوریز نړۍوال جام په لومړۍ لوبه کې د نیوزیلنډ لوبډلې پروړاندې د سیالۍ ډګر ته ښکته کېږي. دغه لوبه چې د څلورم ګروپ برخه ده، سبا یکشنبه (د سلواغې ۱۹مه) د هند د چینای ښار په چیدامبارام لوبغالي کې ترسره کېږي.
افغانستان د دغه ټورنمنټ په پیل کې له خپل یو تر ټولو پیاوړي سیال سره مخ دی او دا هغه لوبه ده، چې د سیالیو بل پړاو ته د افغان کرېکټ لوبډلې په لاره کې خورا اغېزناکه ثابتېدای شي.د شل اوریز کرېکټ نړۍوال جام لسمه دوره د ۱۴۰۴ کال د سلواغې له ۱۸مې څخه د کب تر ۱۷مې پورې د هند او سريلانکا په کوربهتوب ترسره کېږي. په دې سیالیو کې ۲۰ لوبډلې شتون لري، چې په څلورو پنځه کسیزو ګروپونو کې سره لوبېږي. افغانستان په څلورم ګروپ کې له نیوزیلنډ، سوېلي افریقا، متحده عربي اماراتو او کاناډا سره په یو ګروپ کې دی او په ګروپي پړاو کې به څلور لوبې ترسره کړي.په دغه ګروپ کې نیوزیلنډ او سوېلي افریقا د خپل نړۍوال مقام او مخینې لهمخې د افغانستان لپاره تر ټولو سخت سیالان ګڼل کېږي. د افغانستان د کرېکټ ملي لوبډله په خپلو لومړنیو دوو لوبو کې د همدغو دوو لوبډلو پر وړاندې میدان ته وځي او بل پړاو ته د وتلو د چانس زیاتولو لپاره اړتیا لري، چې لږترلږه یوه لوبه وګټي ځکه چې پر کاغذ متحده عربي امارات او کاناډا نسبتا اسانه سیالان ښکاري.د شل اوریزو لوبو د نړۍوالې درجه بندۍ لهمخې، نیوزیلنډ په څلورم، سوېلي افریقا په پنجم، افغانستان په لسم، متحده عربي امارات په اوولسم او کاناډا په نولسم مقام کې ځای لري.نیوزیلنډ تراوسه په ۲۵۱ نړۍوالو شل اوریزو لوبو کې میدان ته وتلی، چې پایله یې ۱۲۷ بریاوې او ۱۰۳ ماتې دي. دغې لوبډلې په روان میلادي کال کې په پنځو شل اوریزو لوبو کې یوه بریا او څلور ماتې ثبت کړې دي او ۹ ځلې یې په شل اوریز نړۍوال جام کې ګډون کړی دی. په دغو سیالیو کې د نیوزیلنډ غوره پایله په ۲۰۲۱ کال کې تر پایلوبې رسېدل و. دغه هېواد له ۱۹۲۶ کال راهیسې د کرېکټ د نړۍوالې شورا (ایسيسي) دایمي غړیتوب لري.بل پلو، افغانستان له ۲۰۱۷ کال راهیسې د کرېکټ د نړۍوالې شورا (ایسيسي) دایمي غړیتوب ترلاسه کړی دی. د افغانستان د کرېکټ لوبډلې په ټولییزه توګه ۱۵۹ نړۍوالې شل اوریزې لوبې ترسره کړې دي، چې پایله یې ۹۶ بریاوې او ۶۰ ماتې وې. افغانستان تر دې دمه اووه ځله په شل اوریز نړۍوال جام کې ګډون کړی او تر ټولو ښه لاسته راوړنه یې د تېر پړاو (۲۰۲۴ کال) نړۍوال جام نیمه پایلوبې ته وتل وو.که څه هم کرېکټ یوه د نه وړاندوینې وړ لوبه ده، خو پر کاغذ نیوزیلنډ د افغانستان یو له پیاوړو سیالانو څخه شمېرل کېږي او دا هغه مقابله ده، چې د نړۍوال جام په پیل کې د افغان کرېکټ لوبډلې د تخنیکي او روحي وړتیا لپاره یوه جدي ازموینه ثابتېدای شي.
