داعـ.ش د اسلام اباد د مرګوني برید مسوولیت ومانه

انور ابراهیم د ایکس له لارې په خپور کړي پیغام کې ویلي، چې د اسلام‌اباد د جومات برید، چې د جمعې د لمانځه پر مهال شوی، «پر دیني خلکو یو قصدي او غیرانساني عمل» دی او ټینګار یې کړی، چې د مالیزیا حکومت او ولس د دې غمیزې پر مهال د پاکستان ترڅنګ ولاړ دي.

د مالیزیا لومړي وزیر زیاته کړې، چې د دې برید قربانیانو کورنیو او ټپیانو ته د زړه له کومي خواخوږي وړاندې کوي او د هغو ټولو کسانو ترڅنګ ولاړ دی، چې له دې پېښې اغېزمن شوي دي.

هغه همداراز هیله ښودلې، چې د پاکستان اړوند چارواکي به د دې برید په تړاو هر اړخیزه او بشپړه څېړنه ترسره کړي او عاملین به یې عدالت ته وسپاري.

په عملیاتو کې بوختو چارواکو ویلي، چې د پېښې له ځایه د ځانمرګي بریدګر د پېژندنې اسناد هم ترلاسه شوي دي. د دغو اسنادونو له‌مخې، د بریدګر هویت د «یاسر» په نوم تثبیت شوی دی. د هغه په پېژندپاڼه کې دایمي پته «عباس کالوني، شېرجنګي سړک، چارسده روډ، پېښور» او اوسنۍ پته «ګنج محله قاضیان، پېښور» ثبت شوې ده.

په راپور کې وړاندې راغلي، پلټنو ښودلې چې یاد بریدګر پنځه میاشتې په افغانستان کې تېرې کړې دي او په دغه موده کې یې د وسلو کارولو او ځانمرګو بریدونو د ترسره کولو روزنه ترلاسه کړې ده. راپور زیاتوي، چې د پاکستان امنیتي ادارې د نوموړي د دغه سفر ټول جزییات او په دې موده کې د هغه احتمالي اړیکې له نږدې څاري او پلټي.

هم‌مهاله بیا پر کابل واکمن طالبان د پاکستاني چارواکو دغه ډول څرګندونې غندي او بې‌بنسټه یې بولي. د طالبانو دفاع وزارت په تازه خبرپاڼه کې وویل، چې اسلام‌اباد باید کابل ته د ګوتې نیولو پر ځای پر خپلو امنیت ناکامیو باندې غور وکړي.

جيونیوز لیکي، پولیسو همداراز په پېښور ښار او شاوخوا سیمو کې د بریدګر د احتمالي شبکې، اسانتیا برابرونکو او همکارانو د پېژندنې او نیولو لپاره پراخ عملیات پیل کړي دي. مسوولو چارواکو ټینګار کړی، چې څېړنې له ټولو اړخونو روانې دي او د بریدګر ټولې اړیکې، پیغامونه او د ملاتړ سرچینې په ډېر دقت سره څارل کېږي.

د پولیسو د سرچینو په خبره، تمه ده چې د روانو څېړنو په ترڅ کې نور مهم شواهد او معلومات هم ترلاسه شي، چې د دې ترهګریز برید د شالید د روښانېدو او د ټولو ښکېلو کسانو د پېژندنې په برخه کې به مهم رول ولوبوي.

دا په داسې حال کې ده، چې د جمعې په ورځ د پاکستانه په پلازمېنې اسلام‌اباد کې د یوه جومات دننه ځانمرګي بریدګر ۳۱ تنه ووژل او ۱۶۹ کسان یې ټپیان کړل. د داعش خراسان وسله‌والې ډلې اړوند پاڼو ادعا کړې، چې دا برید د دوی یوه غړي سیف‌الله انصاري کړی دی، خو د پاکستاني چارواکو له‌خوا بیا د دوی دغه ادعا تایید شوې نه ده.

د مقاومت جبهې د سیاسي دفتر مشر عبدالله خنجاني پر خپلې اېکس‌پاڼې لیکلي: «دا برید په افغانستان کې د تېرو ۲۵ کلونو د هغو جنایتونو یادونه تازه کوي، چې طالب ترهګرې دلې د افغانستان پر سپېڅلو دیني او کلتوري ځایونو بریدونه کول».

نوموړي ویلي، چې په اسلام‌اباد کې د شیعه‌ګانو په جومات کې برید په سیمه کې د فکري، اخلاقي او کلتوري تنوع د له‌منځه وړلو لپاره د ترهګرو یوه منظمه هڅه ده.

نوموړي ویلي، چې افغانستان دمګړی د نورو نیابتي ډلو لپاره د فکري او عملیاتي ملاتړ په توګه کارول کېږي او خبرداری ورکوي، چې په افغانستان کې د ترهګرۍ د اصلي سرچینې له منځه وړلو پرته په سیمه کې د سولې او ثبات ټېنګښټ ناممکن دی.

نوموړي همداراز په اېکس‌پاڼه زیاته کړې، چې هېڅ هېواد له ترهګرۍ خوندي نه دی، خو په داسې شرایطو کې د امنیتي ادارو پر خپلو کړنو ویاړ د پوښتنې وړ خبره ده. د جمعیت علمای اسلام ګوند مشر څرګنده کړې، چې د پاکستان امنیتي او استخباراتي ادارې د خلکو د امنیت په ټینګښت کې پاتې راغلي دي.

مولانا فضل‌الرحمان لیکي: «دولتي بنسټونه د ترهګرۍ پر وړاندې د مبارزې پر ځای په سیاسي چارو کې په لاس‌وهنه بوخت دي». هغه نیوکه کړې، چې پاکستاني چارواکي یوازې تر پېښې وروسته د غندلو پر بیانونو تکیه کوي او ملت ته هېڅ ډول قناعت نه ورکوي.

د پاکستان ګڼو سیاستوالو د اسلام‌اباد په ترلای سیمه کې د شیعه‌ګانو د یوه جومات دننه ځانمرګی برید غندلی دی. د شمېرو له‌مخې، دغه برید کې ۳۱ کسان وژل شوي او ۱۶۹ نور ټپیان شوي دي.

د سفارت د خپرې شوې خبرتیا له‌مخې، امریکایي وګړو ته ویل شوي چې له ګڼه‌ګوڼې ډکو سیمو او لویو عامه غونډو څخه ډډه وکړي، خپل شخصي امنیتي پلانونه له سره وارزوي او د وروستیو بدلونونو د معلومولو لپاره په دوامداره ډول سیمه‌ییز خبرونه او رسنۍ وڅاري.

همدارنګه، امریکایي وګړو ته سپارښتنه شوې چې ځان له عامه پاملرنې څخه وساتي، تل خپل د پېژندنې اسناد له ځان سره ولري او د اړتیا پر مهال له پولیسو سره همکاري وکړي. د امریکا سفارت ټینګار کړی، چې د یادو سپارښتنو پلي کول کولای شي په پاکستان کې د سفر او استوګنې پر مهال احتمالي ګواښونه راکم کړي.

امریکا داسې مهال په پاکستان کې خپلو وګړو ته دا خبرداری ورکوي، چې د جمعې په ورځ په اسلام‌اباد کې یوه ځانمرګي بریدګر د یوه جومات دننه په ځان پورې تړلو چاودېدونکو توکو ته چاودنه ورکړه، چې له امله یې ۳۱ کسان ووژل شول. همداراز، په دې برید کې ۱۶۹ کسان ټپیان شوي او روغتیاپالانو د ځینو ټپیانو روغتیایي وضعیت نازک ښودلی دی.