داعـ.ش د اسلام اباد د مرګوني برید مسوولیت ومانه
داعـ.ش د جمعې په ورځ په اسلام اباد کې د شیعه وو په یوه جومات کې د مرګوني برید مسوولیت په غاړه واخیست. دغه ډلې ویلي چې بریدګر د خپل ځانمرګي واسکټ د چاودولو دمخه په امنیتي ساتونکو ډزې وکړې. پاکستاني چارواکو ویلي چې په دې برید کې ۳۱ کسان وژل شوي او له ۱۶۰ څخه ډیر ټپیان شوي دي.
دا برید د نړۍ د یو شمیر هیوادونو لخوا غندل شوی دی.
په اسلام اباد کې د امریکا سفارت د برید په غندلو سره ویلي چې متحده ایالات د سولې او امنیت د پرمختګ لپاره د پاکستان د هڅو ملاتړ ته دوام ورکوي او د ثبات د ودې لپاره په ګډه کار کولو ته ژمن دی.
د سفارت په خبرپانه کې ویل شوي، چې امریکا په دې سخت وخت کې د پاکستان سره ولاړه ده.
په اسلام اباد کې د ایران سفیر رضا امیري مقدم دا برید یو ترهګریز برید وباله او د قربانیانو له خپلوانو سره یې خواخوږي څرګنده کړه.
طالبانو هم دا برید «د اسلامي او بشري ارزښتونو پر ضد» وباله.
