سياېناېن: د ټرمپ اداره لا هم په منځني ختیځ کې د امریکایي ځواکونو پیاوړتیا ته دوام ورکوي
سياېناېن د یوه جګپوړي امریکایي چارواکي له قوله د متحده ایالاتو د ولسمشر د استازو سټیو وېټکاف او جرډ کوشنر لهخوا د ابراهیم لینکن په نوم د الوتکې وړونکې بېړۍ څخه د لیدنې په اړه لیکلي، چې د امریکا د مرکزي قوماندانۍ (سنټکام) قوماندان ورته بلنه ورکړې وه، څو له دې بېړۍ لیدنه وکړي.
دغه چارواکي زیاته کړه، چې د دغه سفر موخه په سیمه کې له امریکایي پوځي ځواکونو څخه مننه او قدرداني وه. دا لیدنه په داسې حال کې ترسره شوې، چې یوه ورځ وړاندې د عمان په پلازمېنه کې د متحده ایالاتو او ایران ترمنځ مذاکرات شوي وو.
سياېناېن ویلي، دا لیدنه د دې ټکي یادونه کوي چې په داسې حال کې چې متحده ایالات او ایران اوس یو ځل بیا په مذاکراتو بوخت دي، د ټرمپ اداره لا هم په منځني ختیځ کې د امریکا د پوځي ځواکونو د پام وړ پیاوړتیا ته دوام ورکوي.
د یادې خبري شبکې په وینا، دغه پوځي حضور په وروستیو اوونیو کې د ټرمپ لهخوا پر ایران د برید د انتخابونو د ارزونې له امله چټکتیا موندلې، خو تراوسه داسې هېڅ نښه نشته چې د دغو انتخابونو د پرمخ وړلو په اړه کومه پرېکړه شوې وي.
په سیمه کې یوې سرچینې سياېناېن ته ویلي، چې د عمان او د ایران چارواکي له دې مخکې د وېټکاف او کوشنر د دې الوتکو لېږدوونکې بېړۍ له لیدنې خبر شوي وو.
