د کابل ولایت لپاره د طالبانو د رسنیو دفتر وايي، د کابل ښار د ۲۱ ناحیې په شاوخوا سیمو کې په یوه کور کې د ګاز نیونې له امله ۸ کسان مړه شوي دي. په ژمي کې ډېری کابل مېشتي د ناسم اقتصادي وضعیت له امله له ګازو استفاده کوي او ځينې وختونه د دغه ډول مرګونو پېښو لامل کېږي.
د کابل ولایت لپاره د طالبانو د رسنیو دفتر د شنبې په ماخوستن (د سلواغې ۱۸مه) د یوې خبرپاڼې په خپرولو سره ویلي، تېره شپه (جمعه د سلواغې ۱۷مه) د کابل ښار د ۲۱مې ناحیې د ۷م ګذر اړوند په یوه کور کې د ګاز نیونې له امله ۸ کسان مړه شوي دي.
خبرپاڼه کاږي، سبا (یکشنبه د سلواغې ۱۹مه) به یو پلاوی یاد کور ته واستول شي او د پېښې د څرنګوالي د معلومولو او همدردۍ له څرګندولو سربېره به له متضررې کورنۍ سره مرستې هم وکړي.
د یادونې وړ ده، چې په ژمي موسم کې په کابل کې ډېری کورنۍ د اقتصادي ستونزو له امله یا په یخنۍ کې شپې او ورځې تېروي او یا د ګازو په وسیله خپل کورونه تودوي او په دې سره بیا دغه ډول مرګونې پېښې هم رامنځته کېږي.
