طالبانو د ننګرهار په مومند درې ولسوالۍ کې د راکړې ورکړې پر مهال د پاکستانۍ کلدارې د کارونې له امله ۶ هټۍ وتړلې. د دغه ولایت لپاره د طالبانو امنیتي مسوولین وايي، په هېواد کې د پاکستانۍ کلدارو کارونه په «مطلق» ډول منع ده.
په افغانستان کې د جمهوري نظام په وروستیو کې په ډېریو ختیځو او سویل ختیځو ولایتونو کې د پاکستانۍ کلدارو پر چلښت بندیز ولګېد او طالبانو هم له بیا واکمنېدو سره همدغه سیاست وڅاره. خو داسې ښکاري چې لا هم په ځينو ختیځو او سویل ختیځو ولایتونو کې پر پاکستانۍ کلدارې راکړه ورکړه کېږي.
د ننګرهار ولایت لپاره د طالبانو د امنیه قومندانۍ ویاند سید طیب حماد د شنبې په ورځ (د سلواغې ۱۸مه) وویل: «د مومند درې ولسوالۍ امنیه قومندانۍ د کلدارو د بندېدو ګډ کمېسیون نن د دهزار ناو په بازار کې د څارنې پر مهال د کلدارو د کارونې له امله څلور عمده پلورنځي، یو د موبايلونو پلورنځی او یو نانوایي وتړل او مهر و لاک شول».
نوموړي یو ځل بیا خبرداری ورکړ، چې د کلدارو کارونه په مطلق ډول منع ده او په وینا یې له سرغړوونکو سره به قانوني چلند وشي.
د یادونې وړ ده، چې پخوا به په لویدیځو ولایتونو کې ایراني تومان او په ختیځ، سویل ختیځ او سویلي ولایتونو کې په ورځنیو چارو او راکړو ورکړو کې تر ډېره پاکستانۍ کلدارې کارول کېدې، خو د جمهوري نظام په وروستیو کې په ډېریو ولایتونو کې پر بهرنیو اسعارو او په ځانګړې ډول پر پاکستانۍ کلدارو راکړه ورکړه بنده شوه او طالبانو هم د تېر نظام دغه پالیسي تعقیب کړه، خو داسې ښکاري چې طالبان لا تر اوسه په بشپړه توګه پر دغې چارې نهدي بریالي شوي.
