ځايي سرچینو افغانستان انټرنشنل ته ویلي چې طالبانو په بادغیس کې د افغانستان د پخوانۍ ملي اردو یو قوماندان او د هغه زوی نیولي دي. ډګروال عبدالسلام د جمهوري نظام پر مهال د ۲۰۷ ظفر قول اردو د درېیمې لوا د لومړي کنډک قوماندان و.
د سرچینو په وینا، طالبانو عبدالسلام د سلواغې پر۱۸مه نیولی دی.
دغه سرچینې زیاتوي، کله چې د هغه خپلوان د نوموړي په لټون پسې راووتل، د هغه زوی عبدالمتین هم د بادغیس په مرکز قلعهنو ښار کې ونیول شو.
عیني شاهدانو ویلي چې وسلهوالو کسانو د قلعهنو ښار په بازار کې د عبدالمتین مخ ور وپوښه او نامعلوم ځای ته یې یووړ.
طالبانو تر اوسه دا نه ده تایید کړې چې یاد کسان یې نیولي دي.
د سرچینو په وینا، عبدالسلام په هرات کې اوسېده او تازه د یوې ټوټې ځمکې د پلورلو لپاره بادغیس ته تللی و.
طالبانو په تېرو څو کلونو کې د پخواني جمهوري نظام ګڼ سرتېري نیولي، شکنجه کړي او ځینې وژل شوي دي.
د بشري حقونو بنسټونه خبرداری ورکوي چې دا ډول نیونې، شکنجې، جبري نادرکۍ او هدفي وژنې د طالبانو د «عمومي بښنې» له ادعا سره په ټکر کې دي.
