په پاکستان کې د ملګرو ملتونو د کډوالو عالي کمېشنرۍ (یونسیار) استازې ویلي، چې افغان کډوال او پناهغوښتونکي په دغه هېواد کې له ګڼو ننګونو او د بنسټیزو حقونو له محدودېدو سره مخ دي او د هغوی د خوندیتوب او انساني کرامت ساتنه بېړنۍ اړتیا ده.
په پاکستان کې د یونسیار استازې، فیلیپا کینډلر، دا څرګندونې د لاهور په ښار کې د «اسما جهانګیر» کنفرانس پر مهال وکړې. نوموړې د «بنسټیزو حقونو له زوال او د پولې هاخوا د مقاومت» تر سرلیک لاندې وینا کې، د افغان کډوالو او پناهغوښتونکو پر وضعیت خبرې وکړې.
د یونسیار د معلوماتو له مخې، فیلیپا ټینګار وکړ چې افغان کډوال په پاکستان کې له حقوقي، ټولنیزو او امنیتي ستونزو سره مخ دي او اړتیا ده چې د هغوی د خوندیتوب، قانوني ملاتړ او انساني وقار د تأمین لپاره جدي او عملي ګامونه واخیستل شي.
هغې زیاته کړه، چې یونسیار د خپلو شریکانو په همکارۍ هڅه کوي، څو د افغان کډوالو او پناهغوښتونکو غږ نړیوالو ته ورسوي او د هغوی د حقونو د خوندي کېدو لپاره ملاتړ پیاوړی کړي.
په پاکستان کې د افغان کډوالو پر وړاندې اقدامات سخت شوي، په ټولو ښارونو کې پولیس د افغانانو د نیولو لپاره عملیات چټک کړي، افغانان نیول کیږي او جبري افغانستان ته ستانه کړل کیږي. په پلازمینه اسلام اباد کې بیا داسې راپورونو نه هم ترلاسه شوي چې پولیسو د هغه کورونو دروازې ماتې کړي چې شک کېده چې افغانان به پکې میشت وي.
راپورونه وایي چې په جبري ستنو وشویو افغانانو کې هغه کسان هم شامل دي چې په افغانستان کې ژوند له ګواښ سره مخ دی.
