د ملګرو ملتونو د بشري چارو د همغږۍ دفتر (اوچا) وايي، د طبیعي پېښو، اقتصادي ستونزو او جبري ستنېدنو د زیاتوالي له امله به په ۲۰۲۶ کال کې په افغانستان کې شاوخوا ۴،۲ میلیونه کسان د سرپناه او غیرخوراکي توکو بېړنۍ مرستې ته اړتیا ولري.
اوچا په خپله تازه خبرپاڼه کې ویلي، چې بشري مرستندویان پلان لري په ۲۰۲۶ کال کې نږدې ۸۸۱ زره زیانمنو کسانو ته د بیړنۍ سرپناه او غیرخوراکي توکو مرستې ورسوي، خو د دې لپاره شاوخوا ۱۶۰،۳ میلیونه امریکايي ډالرو ته اړتیا ده.
د خبرپاڼې له مخې، په افغانستان کې روانه څو اړخیزه بشري کړکېچ، چې د طبیعي افتونو، اقتصادي فشارونو، ټولنیزو نابرابریو او سیاسي عواملو له امله لا ژور شوی، د خلکو زیانمنوالی زیات کړی او د سرپناه اړتیا یې لوړه کړې ده.
اوچا ټینګار کړی چې ښځېبې سرپرسته کورنۍ، بېځایه شوي او ستانه شوي کډوال تر ټولو ډېر له ګواښ سره مخ دي.
اوچا زیاته کړې، چې یوازې په ۲۰۲۵ کال کې له سېلابونو او سختو بارانونو څخه تر ۱۵ زرو ډېر کسان اغېزمن شوي، چې ۹۰ سلنه یې لا هم په خېمو یا زیانمنو کورونو کې ژوند کوي. همداراز، تر څلورو میلیونو ډېر کسان هېواد ته راستانه شوي، چې نږدې څلورمه برخه یې لا هم سرپناه خپله تر ټولو ستره اړتیا بولي.
د ملګرو ملتونو د ارزونو له مخې، سره له دې چې په وروستیو دوو کلونو کې غیررسمي مېشتځایونه کم شوي، خو لا هم شاوخوا ۳۹۰ زره کورنۍ په نږدې ۹۰۰ غیررسمي مېشتځایونو کې اوسیږي.
اوچا خبرداری ورکړی، که لازمې مالي سرچینې برابرې نه شي، سلګونه زره افغانان به په راتلونکي ژمي کې له جدي بشري ګواښونو سره مخ شي.
