د ننګرهار ولایت لپاره د طالبانو امنیه قومندانۍ وايي، په جلالاباد ښار کې یې ۴ کسان د مردارو چرګانو د پلور په تور نیولي دي. د دوی په وینا، دغو کسانو یاد مردار چرګان پر خلکو او هوټلونو پلورل.
د ننګرهار ولایت لپاره د طالبانو د امنیه قومندانۍ ویاند سید طیب حماد د یکشنبې په ورځ (د سلواغې ۱۹مه) وویل، دغه کسان د جلالاباد ښار د لومړۍ امنیتي حوزې اړوند د زاړه ګمرک ترڅنګ په یوه کباړخونه کې په داسې حال کې نیول شوي، چې خلکو او ځینو هوټلونو ته یې مردار شوي چرګان د پلور لپاره برابرول.
د نوموړي په وینا، له یادو کسانو شاوخوا ۱۸۰۰ مردار چرګان هم ترلاسه شوي دي.
ویل کېږي یادو کسانو پر خپلو کړنو اعتراف کړی او تر څېړنو وروسته به عدلي او قضايي بنسټونو ته وسپارل شي.
