د حزب اسلامي د مشر ګلبدین حکمتیار زوی حبیبالرحمان حکمتیار د طالبانو د رييس الوزرا د اقتصادي مرستیال ملا برادر هغه څرګندونو ته چې افغانستان یې له «زقوم ونې» سره تشبیه کړی و ویلي:«افغانستان د دوزخیانو ځای نه دی چې زقوم په کې کرۍ».
په کابل کې د طالبانو له لوري له سیاسي فعالیتونو څخه راګرځول شوی حبیبالرحمن حکمتیار د طالبانو د رییس الوزرا اقتصادي مرستیال ملا عبدالغني برادر د څرګندونو په غبرګون پر خپلې اېکسپاڼې لیکلي: «افغانستان ښکلی او میلمهپال هېواد دی، دوزخ او د دوزخیانو ځای نه دی، چې په هغه کې د زقوم ونه وکرۍ، بلکې ټول توحیدپال دي، تل مظلوم وو او د دسیسو قرباني شوي دي».
نوموړي دا څرګندونې د عبدالغني برادر د هغه څرګندونو په غبرګون کې کړي، چې افغانستان یې له «زقوم ونې» سره ورته بللی وو.
عبدالغني برادر ویلي: «افغانستان د زقوم ونې په څېر دی، نوي زېږېدلي ماشومان یې نه شي هضمولی».
عبدالغني برادر یادې څرګندونې د یکشنبې په ورځ (د سلواغې ۱۹مه) د طالبانو د ملي دفاع وزارت اړوند نظامي پوهنتون د حضرت معاذ بن جبل (رض) نظامي اکاډمۍ د اوولسمې دورې په فراغت غونډه کې کړې دي.
ځينو شنونکو بیا له دې اصطلاح څخه د ملا برادر موخه سیاسي او سیالانو ته کنایه بللې ده.
