په بلخ کې د طالبانو امنیه قومندانۍ ویلي، چې د ښځو په ګډون یې اووه کسان د باج اخیستنې (بلک مېل) په تور نیولي دي. طالبانو ویلي، چې یادو کسانو د ټولنیزو رسنیو له لارې له خلکو غیراخلاقي عکسونه او ویډیوګانې اخېستلې او له دې لارې به یې بیا له هغوی څخه پیسې اخېستلې.
په بلخ کې د طالبانو امنیه قومندانۍ د یکشنبې په ورځ (د سلواغې ۱۹مه) په یوې ویډیو کې د ښځو په ګډون د هغو کسانو اعترافونه خپاره کړي، چې ویل کېږي له خلکو څخه یې باج اخیستنه کوله.
په بلخ کې د طالبانو امنیه قومندانۍ ویلي، چې له یادې ډلې څخه یې په تېره یوه اونۍ کې د ښځو په ګډون اووه کسان نیولي دي.
په بلخ کې د طالبانو د امنیه قوماندانۍ د جنايي پېښو پر وړاندې د مبارزې مدیر فیضالله فیض وايي، چې په تېره یوه نیمه اونۍ کې څلور داسې قضیې ورته راغلي، چې د یوه نارینه او یا یوې ښځې غیر اخلاقي ویډیو یا عکسونه ترې اخېستل شوي او وروسته د پېسو او یا د نامشروع غوښتنې د نهپوره کولو په صورت کې به پر ټولنیزو رسنیو د خپرېدو ګواښونه شوي دي.
فیض الله فیض زیاته کړې: «د ځینو قضیو په تړاو مو یو شمېر کسان نېولي دي او هغوی په خپل کړي جرم اعترافونه کړي دي او وروسته به یې موږ عدلي ادارو ته وسپارو».
د طالبانو لهخوا په خپره شوې ویډیو کې د باج اخیستنې په تور نیول شوي کسان وايي، د واټساپ، فېسبوک، سنپچټ او نورو ټولنیزو رسنیو له لارې به یې د افغانستان داخل او بهر کې کسان هدف ګرځول او د هغوی د غیر اخلاقي انځورونو او ویډیوګانو له ترلاسه کولو وروسته به یې له هغوی څخه د پېسو غوښتنې کولې.
