د طالبانو د هرات والي د روژې په مناسبت د خوراکي توکو پر زیاتو وارداتو ټینګار کړی

په کابل کې د طالبانو له لوري له سیاسي فعالیتونو څخه راګرځول شوی حبیب‌الرحمن حکمتیار د طالبانو د رییس الوزرا اقتصادي مرستیال ملا عبدالغني برادر د څرګندونو په غبرګون پر خپلې اېکس‌پاڼې لیکلي: «افغانستان ښکلی او میلمه‌پال هېواد دی، دوزخ او د دوزخیانو ځای نه دی، چې په هغه کې د زقوم ونه وکرۍ، بلکې ټول توحیدپال دي، تل مظلوم وو او د دسیسو قرباني شوي دي».

نوموړي دا څرګندونې د عبدالغني برادر د هغه څرګندونو په غبرګون کې کړي، چې افغانستان یې له «زقوم ونې» سره ورته بللی وو.

عبدالغني برادر ویلي: «افغانستان د زقوم ونې په څېر دی، نوي زېږېدلي ماشومان یې نه شي هضمولی».

عبدالغني برادر یادې څرګندونې د یکشنبې په ورځ (د سلواغې ۱۹مه) د طالبانو د ملي دفاع وزارت اړوند نظامي پوهنتون د حضرت معاذ بن جبل (رض) نظامي اکاډمۍ د اوولسمې دورې په فراغت غونډه کې کړې دي.

ځينو شنونکو بیا له دې اصطلاح څخه د ملا برادر موخه سیاسي او سیالانو ته کنایه بللې ده.

په بلخ کې د طالبانو امنیه قومندانۍ د یکشنبې په ورځ (د سلواغې ۱۹مه) په یوې ویډیو کې د ښځو په ګډون د هغو کسانو اعترافونه خپاره کړي، چې ویل کېږي له خلکو څخه یې باج اخیستنه کوله.

په بلخ کې د طالبانو امنیه قومندانۍ ویلي، چې له یادې ډلې څخه یې په تېره یوه اونۍ کې د ښځو په ګډون اووه کسان نیولي دي.

په بلخ کې د طالبانو د امنیه قوماندانۍ د جنايي پېښو پر وړاندې د مبارزې مدیر فیض‌الله فیض وايي، چې په تېره یوه نیمه اونۍ کې څلور داسې قضیې ورته راغلي، چې د یوه نارینه او یا یوې ښځې غیر اخلاقي ویډیو یا عکسونه ترې اخېستل شوي او وروسته د پېسو او یا د نامشروع غوښتنې د نه‌پوره کولو په صورت کې به پر ټولنیزو رسنیو د خپرېدو ګواښونه شوي دي.

فیض الله فیض زیاته کړې: «د ځینو قضیو په تړاو مو یو شمېر کسان نېولي دي او هغوی په خپل کړي جرم اعترافونه کړي دي او وروسته به یې موږ عدلي ادارو ته وسپارو».

د طالبانو له‌خوا په خپره شوې ویډیو کې د باج اخیستنې په تور نیول شوي کسان وايي، د واټساپ، فېسبوک، سنپ‌چټ او نورو ټولنیزو رسنیو له لارې به یې د افغانستان داخل او بهر کې کسان هدف ګرځول او د هغوی د غیر اخلاقي انځورونو او ویډیوګانو له ترلاسه کولو وروسته به یې له هغوی څخه د پېسو غوښتنې کولې.

په کابل کې د ایران سفارت د یکشنبې په ورځ (د سلواغې ۱۹مه) د یوې خبرپاڼې په خپرولو سره ویلي، چې د ایران د بهرنیو چارو وزارت د حقوقي او نړۍوالو چارو مرستیال کاظم غریب‌ابادي د طالبانو د سرحدونو، قومونو او قبایلو چارو له وزیر سره د ایران او افغانستان ترمنځ د سرحدي همکاریو پر دوام او پیاوړتیا ټینګار کړی دی.

په خبرپاڼه کې راغلي، چې دواړو لورو د سرحدي اسنادو او نښو پر بیارغونې او نوي کولو ټینګار کړی دی.

یاد طالب او ایراني چارواکو د سرحدي همکاریو د پیاوړتیا په تړاو د ګډو تخنیکي او حقوقي ناستو پر دوام او چټکتیا هم هوکړه کړې ده.

په خبرپاڼه کې راغلي، چې د دواړو لورو د هوکړې له‌مخې به د ایران او طالبانو د لوړپوړو سرحدي چارواکو راتلونکې ناسته په ۱۴۰۵ کال کې د ایران په کوربتوب ترسره شي.

د افغانستان او ایران تر منځ سرحد شاوخوا ۹۲۱ کیلومتره اوږدوالی لري او ایران پروسږکال د دغه سرحد د تړلو لپاره د دېوال جوړولو چارې پیل کړې او ویل کېږي پر شاوخوا ۱۰۰ کیلومتره یې دېوال جوړ کړی دی.

تهران د دغې چارې موخه ایران ته د «ترهګرو او نشه‌يي توکو د قاچاقچیانو» له ننوتلو مخنیوی په ګوته کړی او چارواکو یې ویلي، چې دا کار به په یوه اته کلنه موده کې بشپړه شي.

د یادونې وړ ده، چې د طالبانو له بیا واکمنېدو وروسته په سرحدي سیمو کې د طالبانو او ایراني ځواکونو تر منځ هم څو ځلي نښتې هم شوي او له امله یې دواړو خواو ته مرګ ژوبله هم اوښتې ده.

د افغانستان انټرنشنل په یاد راپور کې راغلي وو، چې یادو کسانو د جرمني له لوري د منل کېدو ژمنه درلوده او په دې تمه یې په پاکستان کې شپې او ورځې تېرولې چې ګوندې ژر تر ژره جرمني ته ولېږدول شي.

طالبانو په کابل کې د جرمني د پخوانیو محلي کارکوونکو مېلمستون پلټلی | افغانستان انټرنشنل پښتو

دغه کسان چې په‌کې ښځې، نارینه، ماشومان او ان ترانس‌جندر شامل وو، شاوخوا دوه میاشتې مخکې په پاکستان کې د ویزې مودې د پایته رسېدو له امله د پاکستاني پولیسو له لوري په زوره افغانستان ته ولېږدول شول او بیا د کابل په یوه میلمستون کې ځای پر ځای شول.

طالبانو په کابل کې د جرمني د پخوانیو محلي کارکوونکو د مېلمستون څارنه سخته کړې | افغانستان انټرنشنل پښتو

دغه کسان د جرمني سیمه‌ییز کارکوونکي او تر ګواښ لاندې کسان دي.

د جرمني دولت اعلان کړی، چې د طالبانو له تحقیقاتو سره سره د یادو ۷۹ افغان پناه‌غوښتونکو وضعیت «ګواښوونکی» نه‌ګڼي او هېڅ داسې دلیل هم نه‌ګوري چې یادو کسانو ته د منل کېدو بیاځلي وعده ورکړي او لومړی یې پاکستان او له هغه ځایه یې بیا جرمني ته ولېږدوي.

د جرمني رسنیو د دغه هېواد د کورنیو چارو وزارت د چارواکو له قوله لیکلي، دغه هېواد په ټوله کې د منل کېدو د ژمنو شاوخوا نیمايي یې لغو او یا هم بې‌اعتباره کړي دي. دوی په ډاګه کړې، دغه ژمنې حقوقي الزامیت نه‌لري او د یادو کسانو د منلو په برخه «سیاسي ګټې» نشته.

د جرمني د کورنیو چارو وزارت په وینا، په دغه ډول کسانو کې امنیتي اندېښنې ډېرې محدودې وې، ځکه په څه باندې ۵۴۰۰ شویو مرکو کې یوازې شاوخوا ۳ سلنه امنیتي پېښې مطرح شوې وې.

په جرمني کې د چپي ګوند استازي کلارا بونګر دغه شمېر «د کډوالۍ فډرالې ادارې پر مخ درنه سپېړه» بللې ده. هغه ویلي، په کابل کې د یادو پناه‌غوښتونکو پر مېلمستون د طالبانو له یرغل وروسته دغه کسان په مشخص ډول تر ګواښ لاندې دي او په ټينګار سره یې څرګنده کړې چې، د جرمني دولت د هغوی د برخلیک مسوول دی.

د بشري حقونو فعالین هم د جرمني پر دولت په نیوکو سره وايي، یو شمېر افغانانو ته د منلو د وعدې له ورکړې سربېره لا هم یاد افغانان په بې‌برخلیکۍ کې شپې او ورځې تېروي او ځینې یې د مرګ له ګواښ سره مخ کړي دي.

د طالبانو د امر بالمعروف او نهې عن المنکر وزارت ویاند سیف الاسلام خیبر د ملګرو ملتونو د مرستندویه پلاوي دفتر یا «یوناما» له‌خوا په افغانستان کې د بشري حقونو د وضعیت په اړه د درې میاشتني راپور په ردولو سره ویلي، چې د ښځو او نارینه‌وو پر وړاندې د خپل سرو نېونو او تاوریخوالي هېڅ اقدام نه‌دی ترسره شوی.

سیف السلام خیبر زیاته کړې: «هېڅ داسې اقدام نه‌دی تر شوی او نه به چاته اجازه ورکول شي، چې په هغه کې د ښځو او نارینه‌وو پر وړاندې خپل سري نیونې، تاوتریخوالی او یا هم ناوړه چلند ترسره شوی وي».

نوموړي له خلکو غوښتنه کړې، چې د یوناما او نورو بنسټونو په دغه ډول راپورونو دې باور نه‌کوي.

د ملګرو ملتونو د مرستندویه پلاوي دفتر (یوناما) د افغانستان د بشري حقونو د وضعیت په اړه خپل درې میاشتني راپور کې ویلي، چې د ۲۰۲۵ کال له لومړۍ نیټې څخه تر ډسمبر میاشتې پورې د طالبانو له لوري لږ تر لږه ۱۴ پخواني نظامیان وژل شوي دي.

همدارنګه یوناما په خپل راپور کې د طالبانو د امر بالمعروف او نهي عن‌المنکر وزارت د کړنو په اړه اندېښنه څرګنده کړې ده.

د یوناما د راپور له‌مخې، د ۲۰۲۵ کال له اکټوبر څخه تر ډسمبر پورې، د طالبانو د امربالمعروف او نهې عن المنکر وزارت محتسبانو لږ تر لږه ۵۲۰ کسان په «خپل سري ډول» نیولي دي او په همدې موده کې د ښځو او نارینه‌وو پر وړاندې د بد چلندۍ لږ تر لږه ۵۰ پېښې ثبت شوي، چې ډېری یې د ږیرې یا ویښتانو لویدیځ سټایل جوړول، د موسیقۍ غږولو یا اورېدو او د حجاب د مقرراتو نه مراعتولو په تړاو دي.