د هرات ولایت لپاره د طالبانو والي نور احمد اسلامجار په هرات کې د یوه خصوصي معالجوي روغتون د پرانېستې په مراسمو کې د درملنې لپاره له هېواده بهر د خلکو د سفرونو په اړه اندېښنه څرګنده کړه او له ډاکترانو یې وغوښتل، چې خپله علمي کچه لوړه کړي.
د هرات د والي مطبوعاتي دفتر د شنبې په ورځ (د سلواغې ۱۸مه) د یوې خبرپاڼې په خپرولو سره وویل، نور احمد اسلامجار په دغه ولایت کې د یوه خصوصي روغتون د پرانیستلو په مراسمو کې ویلي، چې په هرات کې د طب په برخه کې د پام وړ پرمختګونه شوي او دا ولایت د افغانستان په «طبي قطب» بدل شوی دی؛ خو زیاته یې کړه چې دا لاسته راوړنې بسنه نه کوي او ډاکټران باید خپله علمي کچه او د روغتونونو د خدمتونو کیفیت لا لوړ کړي.
نوموړي د درملنې لپاره له هېواده بهر د خلکو د سفرونو په اړه اندېښنه څرګنده کړه او له ډاکترانو یې وغوښتل، چې په روغتونونو کې باید ناروغانو ته ښه رسېدنه په خپلو لومړیتوبونو کې راولي او همداراز معیاري او فوقتخصصي روغتیايي خدمات وړاندې کړي.
د دغه طالب چارواکي څرګندونې په داسې حال کې دي، چې د طالب چارواکو په ګډون شتمن افغانان له هېواده بهر درملنې ته لومړیتوب ورکوي، ځکه په کور دننه تشخیص ضعیف او د درملو کیفیت ډېر ټيټ دی.
د یادونې وړ ده، چې د هرات ښار په ۱۱مه ناحیه کې یو خصوصي معالجوي روغتون د شاوخوا ۷۹ میلیونه افغانیو په پانګونې سره په ۵ پوړونو کې په معیاري او مجهز ډول جوړ شوی دی.
