مفتي عثماني: په پاکستان کې روان ترهګریز بریدونه د بهرنیو ځواکونو له ملاتړ پرته ناشوني دي
د طالبانو ملاتړي او د پاکستان نامتو دیني عالم مفتي محمد تقي عثماني وایي، په پاکستان کې د ترهګریزو پېښو دوام دا ښيي چې «یو بهرنی ځواک» د دې بریدونو تر شا ولاړ دی او ټینګار کوي چې د هېواد د بېثباته کولو پر ضد یوازینی اغېزمن حل، ملي یووالی او د ټولو دیني او سیاسي ډلو ګډ دریځ دی.
مفتي محمد تقي عثماني په ایکس لیکلي، هغه ترهګریز بریدونه چې په پرلهپسې ډول په پاکستان کې ترسره کېږي، په ځانګړي ډول په بلوچستان کې وروستي منظم بریدونه، دا ثابتوي چې دا کړنې له بهرني ملاتړ پرته امکان نه لري.
هغه ویلي، لا د بلوچستان د بېلابېلو سیمو د بریدونو ټپونه تازه وو، چې په اسلاماباد کې «شرمناکه پېښه» رامنځته شوه، چې د ده په وینا د پاکستان د بېثباته کولو د یوې منظمې دسیسې برخه ده.
نوموړي ټینګار کړی، چې د دې ډول دسیسو پر وړاندې مقابله یوازې د ملي یووالي له لارې شونې ده. مفتي تقي عثماني زیاته کړې، د هېواد د امنیت په څېر حساسو موضوعاتو کې باید «ټول دیني او سیاسي مکتبونه» خپل اختلافات یوې خواته کړي او په ګډه د دې ګواښ پر وړاندې ودرېږي.
هغه خبرداری ورکړی، که په ملي کچه یووالی رامنځته نه شي، نو دا ډول بریدونه به نه یوازې دوام وکړي، بلکې د هېواد پر ثبات به لا ډېر منفي اغېز ولري.
