د تېر جمهوري نظام د ولسمشرۍ ماڼۍ لومړي مرستیال امرالله صالح په اسلام اباد کې د شیعه وو په یوه جومات کې د شوي ځانمرګي برید په غبرګون کې ویلي، چې که پاکستان د برید اصلي طراح په اړه کره شواهد لري نو چې هر چیرته وي، تعقیب دې یې کړي. صالح لیکلي:«که نه نو، د دومره لوی پوځ ګټه څه ده؟»
امرالله صالح نن یکشنبه، د سلواغې پر ۱۹مه په اېکس کې لیکلي، چې په پاکستان کې چارواکو اعلان کړی، چې دوی د فبروري په ۶مه په اسلام اباد کې د ترهګریز برید تر شا اصلي طراح نیولی دی او که ریښتیا وي نو تعقیب دې یې کړي.
هغه لیکلي:« که ریښتیا وي نو دا کره شواهد ، یا د ټوپک ګرم میل دی. اوس چې تاسې د هغو کسانو په اړه کره شواهد لرئ چې د پلازمېنې په زړه کې یې لمونځ کوونکي ووژل، نو پوځ بسیج کړئ او هغوی تعقیب کړئ،که هر څوک او هر چېرې وي.»
امرالله صالح پاکستان ته په خطاب کې ویلي، چې «ستاسې ټوپکونه دې غوسه ښکاره کړي، نه ستاسو ټویټونه».
له برید یوه شپې وروسته د پاکستان امنیتي ادارو ادعا وکړه، چې د اسلام اباد وروستي برید طراح په ګډون د هغوی ۴ همکاران یې د عملیاتو پرمهال نیولی دي ، خو وروسته یې وویل چې بریدګر افغان نه دی ، خو افغانستان ته یې سفرونه کړي دي.
ددغه برید مسوولیت داعش وسله والې ډلې پر غاړه اخېستی دی.
