د طالبانو د چارو ادارې رییس نورالحق انور په خپلو تازه څرګندونو کې ادعا کړې، چې د تېر جمهوري نظام د ملي اردو په لیکو کې «نالوستي، بېاحساسه، دیني احساس نه لرونکي او د مړه ضمیر» کسان پر دندو ګومارل کېدل.
د طالبانو د چارو ادارې رییس نورالحق انور د یکشنبې په ورځ (د سلواغې ۱۹مه) د یادې ډلې د اردو سرتېرو فراغت غونډه کې د تېر جمهوري نظام په ملي اردو کې د ګومارل کېدو په اړه ادعا کړې: «د تېر نظام په ملي اردو کې کوښښ دا کېده، چې بېتعلیمه، د وطني احساس نه لروونکي، دیني احساس نه لرونکي او مړ ضمیر لرونکي کسان پر دندو وګومارل شي».
نوموړي همداراز ادعا کړې، چې تېر جمهوري نظام ته د هېواد ساتلو ارزښت نه درلود، بلکې بمبارونه یې کول.
یاد طالب چارواکي د تېر جمهوري نظام د پخواني ملي اردو په اړه دغه ادعا پر داسې مهال کړې، چې د تېر جمهوري نظام د ملي دفاع وزارت په چوکاټ کې د عقیدتي او سیاسي چارو لوی ریاست له لوري، سرتېرو ته د دیني مسایلو، ملي روحیې او هېواد پالنې زدهکړې ورکول کېدلې.
د یاد ریاست اړوند د پخواني ملي اردو په هره قول اردو، لوا او کنډک کې دیني عالمان ګومارل شوي وو، چې سرتېرو ته د عقیدې او احکامو په اړه زده کړې ورکړي او همدارنګه په کابل کې د ملي دفاع پوهنتون او نورو پوځي اکاډمیو کې د «ثقافت اسلامي» مضمون هم تدریس کېده.
