عباس عراقچي د مسقط د خبرو په تړاو له خپلو سیمهییزو سیالانو سره ټلیفوني سلا مشورې وکړې
د ایران د بهرنیو چارو وزیر سید عباس عراقچي د ترکیې، مصر او سعودي عربستان د بهرنیو چارو له وزیرانو سره په جلا جلا ټلیفوني خبرو کې هغوی په مسقط کې د ایران او متحده ایالاتو ترمنځ د غېرمستقیمو خبرو اترو له وروستیو جزییاتو خبر کړل.
د ایران د بهرنیو چارو وزارت د څرګندونو لهمخې، عراقچي په دغو ټلیفوني خبرو کې د روانو مذاکراتو بهیر «یو ښه پیل» وباله، خو په ورته وخت کې یې د امریکايي لوري د نیتونو او موخو په اړه د بېباورۍ د لهمنځه وړلو پر اړتیا ټینګار وکړ.
په همدې حال کې د ترکیې، مصر او سعودي عربستان د بهرنیو چارو وزیرانو د مسقط د خبرو د پیل هرکلی وکړ او ویې ویل، چې د دغو خبرو دوام یوې ډیپلوماټیکې حللارې ته د رسېدو او په سیمه کې د تاوتریخوالي د زیاتېدو د مخنیوي لپاره ډېر ارزښت لري.
