په پېښور کې د سرو زور یو شمېر کاروباریانو افغانستان انټرنشنل – پښتو ته ویلي، چې د امریکا او ایران د کړکېچ له کبله په ټوله نړۍ کې د سرو زرو بیې د پام وړ لوړې شوې دي او له همدې کبله د پښتونخوا په بازارونو کې د سرو زرو روزګار هم خراب شوی دی.
د پېښور په اندر شېر بازار کې د سرو زرو یوه کاروباري وویل، چې د روسیې او اوکراین د جګړې له پیل سره هم د سرو زرو بیې لوړې شوې وې؛ خو اوس د امریکا او ایران ناندریو هم په دغو قیمتونو د پام وړ اغیزې کړي او لوړې شوې دي. د سرو زرو د کاروباریانو په وینا، پښتونخوا کې د دغو لوړو قیمتونو له کبله اوس څوک د سرو زرو اخیستلو پسې نه ورځي او د دوی روزګار ورسره سخت اغېزمن شوی دی.
اندر شېر په خېبرپښتونخوا کې د سرو زرو د کاروبار یو مهم مرکز دی، چې له افغانستان سره هم سوداګریزې اړیکې لري. یو ځايي هټۍوال وایي، پخوا به خلکو د ودونو لپاره لس تولې سره زر اخیستل، خو اوس یوازې دوه تولې اخلي.
هغه زیاته کړه: «د ډېرو زنانهوو ودونه د همدې سرو زرو له کبله پاتې دي. ډېرې تور سرې په کورونو پاتې دي، ډېرو هلکانو او جینکو کوژدې کړې دي، خو د طلا د اخیستلو وس یې نشته». دغه کاروباریان په دې باور دي، چې ډېری کورنۍ نه غواړي چې لوڼې یې پرته له سرو زرو واده شي او د هلکانو کورنۍ یې بیا د اخیستلو توان نه لري.
یو بل دوکاندار اندېښنه څرګنده کړه، چې د سرو زرو نړۍوال بازار بیې باثباته نه دي چې له همدې کبله دوی هم د نرخونو په لوړېدو او کمېدو کې زیانمن کېږي.
اندر شېر بازار چې پخوا پهکې د سرو زرو دوکانونه خورا ډېر وو، اوس کرار کرار دغه کاروبار کمزوری کېږي او کاروباریان هم ترې لاس اخلي.
