په مسکو کې د طالبانو سفارت خبر ورکړی، چې مولوي ګل حسن په روسیه کې له مېشتو افغان سوداګرو سره د هغوی پر ستونزو هر اړخیزې خبرې کړې دي. د سفارت په وینا، په دې ناسته کې د دوه اړخیزو همکاریو، همغږۍ او اقتصادي اړیکو په اړه هم سلا مشورې شوې دي.
د طالبانو سفیر په روسیه کې له مېشتو افغان سوداګرو غوښتي، چې په افغانستان کې هم په بېلابېلو برخو کې پانګونه وکړي او ویلي یې دي، چې هلته ورته لازم فرصتونه برابر شوي دي. په خبرپاڼه کې راغلي، چې په روسیه کې مېشتو سوداګرو خپلې ستونزې، اندېښنې، ننګونې او وړاندیزونه د طالبانو له سفیر سره شریک کړل.طالبان داسې مهال په افغانستان کې د پانګونې خبره کوي، چې تازه ملګرو متلونو اندېښنه ښودلې چې په افغانستان کې د صنعتکارانو او پانګهوالو وضعیت خورا خراب دی.
راپور کې راغلي، چې طالبانو د پانګهوالو ستونزې نه دي حل کړي او نه یې هم ورته مناسب چاپېریال برابر کړی، چې له همدې کبله دوی ناهیلي شوي دي.
یوې سرچینې د نوم د نه ښودلو په شرط افغانستان انټرنشنل - پښتو ته ویلي چې د طالبانو د صنعت او سوداګرۍ وزارت د سوداګرۍ په جوازونو کې د افغانستان د پخواني جمهوري دولت له نومه ځکه استفاده کوي، چې دوی که د خپلې ادارې په نوم جواز ورکړي، په نورو هېوادونو کې د چلښت وړ نه دي.
که څه هم طالبان په خپلو رسمي مکتوبونو او دولتي مراسلاتو کې د «افغانستان اسلامي جمهوریت» پر ځای د «افغانستان اسلامي امارت» کاروي، خو د پاسپورټونو ترڅنګ د سوداګرۍ په جوازونو کې لا هم د پخواني جمهوري نظام نوم لیکل کېږي.
تر اوسه د طالبانو د صنعت او سوداګرۍ وزارت په دې اړه رسمي څرګندونې نه دي کړې، خو دا په داسې حال کې ده، چې د طالبانو حکومت لا هم د نړۍ له لوري په رسمیت نه دی پېژندل شوی او ګڼې سوداګریزې او بانکي چارې له همدې امله له خنډونو سره مخ دي.
اقتصادي شنونکي وايي، د رسمي اسنادو نړۍوال اعتبار د هر حکومت لپاره مهم دی او د رسمیت نهپېژندنې وضعیت د سوداګرۍ، صادراتو او وارداتو بهیر په مستقیم او غیرمستقیم ډول اغېزمن کړی دی.