د پاکستان حکومت پرېکړه کړې، چې ۱۹زره او ۹۷۳ افغان کډوال چې په دغه هېواد کې امریکا ته د تګ په تمه دي؛ بېرته افغانستان ته ستانه کړي. دغه افغان کډوال له امریکا سره د همکارۍ له امله د غچ اخیستنې له ګواښ سره مخ دي.
د «24NewsHD» ټلوېزیوني شبکې د یکشنبې په ورځ د پاکستان د کورنیو چارو وزارت سرچینو په حواله راپور ورکړی، چې د ازاد کشمیر او ګلګت-بلتستان په ګډون به د ټولو ایالتونو د پولیسو مشرانو ته لیکونه واستول شي؛ ترڅو د دغه افغان کډوالو بېرته ستنولو چارې پیل کړي.
دا په داسې حال کې ده، چې د افغان کډوالو د نیولو او بېرته ستنولو لړۍ له تېر یو کال راهیسې خورا چټکه شوې او اکثریت یې هغه خلک دي چې امریکا ته د تګ په تمه دي.
په دغه راپور کې راغلي، زرګونه افغانان په پاکستان کې د امریکا د ویزو په تمه دي؛ خو ښکاري چې امریکا د دوی د منلو لپاره چمتو نهده. د دې ترڅنګ پاکستان به د افغان کډوالو د بېرته ستنولو بهیر عملي کړي.
یاده دې وي، چې په ۲۰۲۱کال کې د طالبانو له بیا واکمنېدو وروسته امریکا زرګونه هغه افغانان چې د دغه هېواد لپاره یې کار کاوه یا د امریکا سره یې تړاو لاره، له افغانستان نه انتقال کړي وو. دوی د طالبانو حکومت د احتمالي غچ اخیستنې له وېرې خوندي ځای ته انتقال شوي وو؛ خو اوس د پاکستان له لوري د بېرته ستنولو له ګواښ سره مخ دي.
