د اسراییل پوځ د لبنان په سوېل کې د «الجماعه الاسلامیه» ډلې یو لوړپوړی غړی نیولی دی
د اسراییل پوځ په یوه اعلامیه کې اعلان وکړ، چې د لبنان په سوېل کې یې د شپنیو عملیاتو پر مهال د «الجماعه اسلامیه» ډلې یو لوړپوړی غړی نیولی دی. دغه پوځ ویلي، چې یاد کس یې د یکشنبې په ماښام اسراییل پولې ته نږدې د کوه داو په سیمه کې په یوه ودانۍ کې نیولی.
په اعلامیه کې راغلي، چې د اسراييل د ځمکنیو ځواکونو ۲۱۰مې لوا «باشان» عسکرو دغه عملیات کړي دي. د اسراییل پوځ زیاته کړې، په وروستیو اوونیو کې ترلاسه شوي استخباراتي معلومات د دې لامل شوي چې د یاد کس د نیولو لپاره د عملیاتو پرېکړه وشي.
د اسراییل ټایمز خبري وېبپاڼې د دوشنبې په ورځ (د سلواغې ۲۰مه) لیکلي، چې «الجماعه الاسلامیه» یوه سني ډله ده چې د اخوانالمسلمین د سیاسي شبکې برخه بلل کېږي. د یادې ډلې پوځي څانګه «د الفجر ځواکونه» نومېږي او په ۱۹۸۰مه لسیزه کې جوړه شوې ده.
دغه ډلې د اسراییل او حزبالله ترمنځ د وروستۍ جګړې پر مهال له لبنان نه څو ځله پر اسراییل بریدونه کړي او تر ډېره یې دغه کړنې د ایران د نیابتي ډلې حزبالله سره په همغږۍ ترسره کړې دي.
د اسراییل پوځ نیول شوی کس د الجماعه الاسلاميه یو لوړپوړی غړی وباله؛ خو د هغه په اړه یې نور جزییات ورنه کړل. له بلې خوا الجماعه الاسلاميه په یوې خبرپاڼه کې د نیول شوي غړي نوم عطوي عطوي ښودلی او ویلي یې دي، وروسته له هغه چې اسراییلي ځواکونو حسبیه سیمې ته ننوتل «دوی هغه له خپل کور څخه وتښتاوه او د هغه کورنۍ یې ووهله».
