د امریکا دفاع وزیر: ټرمپ له ایران سره د خبرو اترو له لارې د یوې هوکړې غوښتونکی دی
د امریکا دفاع وزیر پېټ هګېسټ وایي، د خبرو اترو له لارې هوکړې ته رسېدل به د ایران لپاره عاقلانه انتخاب وي. هغه ټینګار وکړ، چې ډونالډ ټرمپ خپل دریځ په روښانه توګه تهران ته اعلان کړی او د خبرو اترو له لارې د یوې هوکړې غوښتونکی دی.
هګېسټ زیاته کړه، چې نړۍ د امریکا وړتیاوې لیدلي او "د ځواک او مخنیوي له لارې سوله" په عمل کې ښودل شوې ده.
هغه د ایران د اټومي تاسیساتو پر وړاندې د "نیمې شپې" عملیاتو ته په اشارې سره وویل، چې امریکایي ځواکونه تر هغې وړاندې چې ایران یې پر شتون خبر شي، له سیمې وتلي وو او ټینګار یې وکړ، چې بل هېڅ هېواد د داسې عملیاتو د ترسره کولو وړتیا نه لري.
