د روسیې سفیر: پاکستان د روسیې د تیلو د اکتشاف او تولید په برخو کې همکارۍ ته لېواله دی
په پاکستان کې د روسیې سفیر البرت خوروف وايي، پاکستان د روسیې د تیلو د اکتشاف او تولید په برخه کې د همکارۍ لیوالتیا لري. نوموړی ویلي، چې روسیه چمتو ده له پاکستان سره د انرژۍ برخې په پیاوړتیا کې مرسته وکړي.
په اسلام اباد کې د روسیې سفارت نن سې شنبه، د سلواغې پر ۲۱مه په اېکس کې له ټاس سره په دغه هیواد کې د روسیې سفیر البرت خوروف مرکه خپره کړې ده.
د روسیې سفیر البرت خوروف ویلي چې دوی د شوروي اتحاد پرمهال له پاکستان سره د تیلو او ګازو د دولتي شرکت او د تیلو او ګازو د پراختیا شرکت د جوړولو ترڅنګ په مختلفو برخو کې مرسته کړې ده.
نوموړي ویلي، چې په راتلونکو کلونو کې د روسیې او پاکستان ترمنځ د سوداګریزو او اقتصادي اړیکو په برخو کې د پاکستان د وسپنې فابریکو بیا رغونه، د روسیې او پاکستان ترمنځ د ریل پټلۍ اړیکې رامینځته کول، د اوبو په بریښنا کې همکاري، او د انسولین په ګډون د درملو تولید لپاره ګډې پانګونې رامینځته کول شامل دي.
په اسلام اباد کې د روسیې سفیر د بریکس سره د یوځای کېدو لپاره د پاکستان د لیوالتیا هرکلی کړی دی.
