د طالبانو د ټولګټو چارو وزارت خبر ورکړی، چې د درنې واورې له امله د افغانستان په یوشمېر ولایتونو کې لویې لارې او فرعي سړکونه د تګراتګ لپاره په لنډمهالي ډول تړل شوي؛ خو د سالنګ لویه لار لاهم د تګراتګ لپاره پرانیستې ده.
د دغه وزارت د راپور له مخې؛ د سالنګ په تونل او شاوخوا برخو کې دامهال واوره ورېږي، خو یاده لاره د موټرو د تګراتګ لپاره پرانیستې ده. د یاد وزارت په وینا؛ مساپر وړونکي موټر کولای شي له دواړو لورو تګ راتګ پرې وکړي، خو باروړونکو موټرو ته له ټېلرو پرته یوازې له شمال څخه سوېل لوري ته د تګ اجازه ورکړل شوې ده.
په همدې حال کې د بامیان ولایت په بېلابېلو سیمو کې د درنې واورې له امله د حاجیګک، قوناق، شاطو، بکک کوتلونو او د دهن سیاه درې – پل لارې تړل شوې دي. همداراز د یکاولنګ، درهصوف او پنجاب، اب قول کرمان لارې د تګراتګ لپاره په لنډمهالي ډول تړل شوې دي.
ورته مهال په غور ولایت کې هم د سختو واورو له امله د بند بکک، بند بایند، بند غوک، بند بور، لعل او کرمان، بند شاتیغ، حوض بنګي او یوشمېر نورې لارې د تګراتګ لپاره تړل شوې دي. سربېره پر دې د بدخشان ولایت د یاوان لاره هم د تګراتګ لپاره په لنډمهالي ډول تړل شوې ده.
