امریکا له ایران نه د نرګس محمدي او ټولو سیاسي بندیانو د سملاسي خوشې کېدو غوښتنه کړې
د امریکا د بهرنیو چارو وزارت له ایران نه غوښتي، د نوبل د سولې جایزې ګټونکې او د بشري حقونو فعاله نرګس محمدي چې تازه په ۷ نیم کاله بند محکومه شوې او همداراز ټول سیاسي بندیان بېله ځنډه خوشې کړي.
د امریکا د بهرنیو چارو وزارت پر اېکس پاڼه لیکلي، نرګس محمدي له ۵۹ ورځو توقیف وروسته په داسې حال کې چې نه یې وکیل ته لاسرسی لاره او نه یې روغتیایي وضعیت ښه و؛ یوې محکمې ته وړاندې شوې چې د عادلانه محاکمې معیارونه یې هم پوره نهکړل.
د امریکا د بهرنیو چارو وزارت ټینګار کړی، ایران باید «بېله ځنډه» نرګس محمدي او ټول هغه کسان خوشې کړي چې د خپلو سیاسي باورونو او مدني دریځونو له امله بنديان شوي دي. واشنګټن یو ځل بیا پر ایراني چارواکو غږ کړی، چې د بشري حقونو نړۍوال اصول مراعت کړي او د نظر، بیان او مدني فعالیتونو پر وړاندې د زور سیاست پای ته ورسوي.
