په جېنوا کې د افغانستان استازي نصیراحمد اندېشه ویلي، چې افغانستان لا هم د کډوالو په برخه کې د نړۍ له تر ټولو اوږدمهاله او پېچلو ناورینونو سره مخ دی. هغه له نړۍوالې ټولنې او د کډوالو له نوي عالي کمېشنر څخه غوښتي، چې د افغانستان روان بشري ناورین د خپلو لومړیتوبونو په سر کې وساتي.
نوموړي پر اېکس پاڼه لیکلي، چې د جېنوا مېشتو همکارانو سره یو ځای یې د کډوالو لپاره د ملګرو ملتونو له نوي ټاکل شوي عالي کمېشنر برهم صالح هرکلی کړی دی. هغه ټینګار کړی، افغانستان د نړۍ له هغو هېوادونو څخه دی چې د کډوالۍ وضعیت پهکې اوږدمهاله شوی او نږدې اته مېلیونه کسان له ۲۰۲۱کال راهیسې بېځایه شوي دي.
اندېشه خبرداری ورکړی، په داسې حال کې چې د افغانستان لپاره نړۍواله پاملرنه او مالي مرستې مخ پر کمېدو دي؛ په ګاونډیو هېوادونو کې د افغان کډوالو او د هېواد دننه د بېځایه شويو او راستانه شويو کسانو وضعیت خورا کړکېچن دی.
هغه د کډوالو لپاره د ملګرو ملتونو د عالي کمېشنرۍ (UNHCR) د نوښتګرو هڅو ستاینه کړې؛ خو زیاته کړې یې ده چې نوی عالي کمېشنر باید افغانستان او د دغه هېواد روان ناورین د خپلو بنسټیزو لومړیتوبونو په کتار کې وساتي.
په همدې تړاو په جېنوا کې د افغانستان استازولۍ هم پر اېکس پاڼه د نوموړي په حواله لیکلي، چې اندېشه د کډوالو په اړه په لومړۍ ناسته کې د طالبانو تر واک لاندې د افغانستان پېچلی وضعیت تشریح کړی او ویلي یې دي، که څه هم په لوړه کچه تاوتریخوالی کم شوی؛ خو د بشري حقونو سرغړونې لاهم دوام لري او مېلیونونه خلک یې له جدي ګواښونو سره مخ کړي دي.
د اندېشه په وینا؛ د افغانستان له داسې یو حالت سره مخ دی، چې د حل لپاره یې «کره، انعطافمنونکي او ژور درک لرونکي چلند» ته اړتیا ده.
