وسلهوالو په دیره اسماعیل خان کې پنځه پولیس وژلي
وسله والو د خیبر پښتونخوا په دېره اسماعیل خان کې د چارشنبې په ورځ پنځه پولیس وژلي دي. د پولیسو په وینا، برید د ښار په څنډو کې د وسلهوالو پر ضد له عملیاتو وروسته د پولیسو د ستنېدو پرمهال شوی.
د پولیسو په خبرپاڼه کې ویل شوي چې وسلهوالو، چې په یوه ځنګل کې پټ وو، د پولیسو پر ګزمې ډزې وکړې.
خبرپاڼه زیاتوي چې پولیسو په متقابل برید کې څلور وسلهوال هم ووژل.
تر اوسه هېڅ ډلې د دغه برید مسوولیت نه دی منلی.
