د ملګرو ملتونو د کډوالۍ نړۍوال سازمان (IOM) ویلي، چې درنو واورو او سختو ژمنیو شرایطو د افغانستان په بېلابېلو سیمو کې ګڼې کورنۍ له جدي ستونزو سره مخ کړې دي. یاد سازمان ویلي، افغان کورنۍ د سختې یخنۍ او خراب موسمي حالت له امله له کړاو سره مخ دي.
د دغه سازمان په وینا؛ د دوی مرستندویه ډلو په کونړ، پکتیا، پکتیکا، پروان، کندهار او هرات ولایتونو کې ۶۸۱ اغېزمنو کورنیو ته بېړنۍ مرستې رسولې دي.
د کډوالۍ نړۍوال سازمان زیاته کړې، د اړمنو کورنیو ملاتړ دوام لري او هڅه کېږي چې تر ټولو زیانمنو کسانو ته ژر تر ژره رسېدنه وشي. دا په داسې حال کې ده، چې وړاندې د ملګرو ملتونو د کډوالو عالي کمېشنرۍ اندېښنه څرګنده کړې وه، چې افغان راستنېدونکي کډوال د سوړ ژمي او د ملاتړ د اړینو امکاناتو نشتوالي له امله له ستونزمن حالت سره مخ دي.ملګرو ملتونو له دې مخکې هم د ستنېدونکو کډوالو د پراخې څپې په اړه خبرداری ورکړی و او ویلي یې و، چې افغانستان د دغه شمېر راستنېدونکو د منلو کافي ظرفیت نهلري او دا به د هېواد شته ناورین لاپسې پراخ کړي.
