د ایران د هامون شبکې د خپرونو مدیر د «مرګ پر خامنهيي» د شعار له امله له دندې ګوښه شو
د ایران د اسلامي جمهوریت راډیو او ټلوېزیون اعلان کړی، چې د سیستان او بلوچستان ایالت د هامون شبکې د خپرونو مدیر د یوې ژوندۍ خپرونې پر مهال د رامنځته شوې تېروتنې له امله له دندې لرې کړل شوی دی.
دغه پرېکړه وروسته له هغه وشوه، چې یوه راپور ورکوونکي د اسلامي انقلاب د کلیزې د لاریون د نېغ په نېغه پوښښ پر مهال په تېروتنه د «مرګ پر خامنهيي» شعار ورکړ.
د خپرو شویو راپورونو لهمخې، د یادې خپرونې د راپور ورکوونکي او د خپرونو د څارونکي دندې ځنډول شوې دي او نور اړوند کارکوونکي هم د ځواب ویلو لپاره انضباطي کمېټې ته ورپېژندل شوي دي. د ایران دولتي راډیو او ټلوېزیون ویلي، چې دا پرېکړه د مسلکي نظم د ساتلو او د دې رسنۍ د باور او اعتبار د خوندي کولو په موخه شوې ده.
مصعب رسوليزاد چې د هامون شبکې خبریال دی او د هغه د شعار ویلو ویډیو په ټولنیزو رسنیو کې په پراخه کچه خپره شوې وه، د یوې ویډیو په خپرولو سره دا «ژبنۍ تېروتنه» وبلله او له لیدونکو څخه یې بښنه وغوښته.
