د طالبانو تر کنټرول لاندې د کابل ولایت د ښاري ابتدایه محکمې د دویم زون د جزا دېوان ۱۴ کسان، چې اته ښځې هم پکې شاملې دي، د «ناروا اړیکواو زنا» په تور په بند او دُرو وهلو محکوم کړل.
د محکمې د پرېکړې له مخې، یاد کسان له پنځو میاشتو تر یو کال پورې په تنفیذي بند او دُرو وهلو سزا محکوم شوي دي.
د طالبانو د سترې محکمې له تایید وروسته دا سزاوې پر یادو کسانو عملي شوې دي.
د افغانستان پخواني ولسمشرحامد کرزي «پوهې ته د ښځو او نجونو د لاسرسي» نړیوالې ورځې په مناسبت پر افغان ښځو او نجونو غږ کړی، چې له هرې شونې لارې زده کړې وکړي او د ټولنې په پرمختګ کې ونډه واخلي.
کرزي د فبرورۍ ۱۱مې په مناسبت پر خپل اېکس لیکلي، چې په بېلابېلو برخو کې د بشري ټولنې ودې او پراختیا لپاره د ښځو او نجونو ونډه مهمه ده او دا یوازې هغه وخت ممکنه ده چې ښځې او نجونې زده کړو ته لاسرسی ولري.
پخواني ولسمشر په ټولنیز ژوند کې د افغان ښځو او نجونو د رول ستاینه کړې او هغوی ته یې سپارښتنه کړې چې د علم او زده کړو د ترلاسه کولو او د هېواد په وده او پرمختګ کې د برخې اخېستلو لپاره له هرې ممکنې لارې هڅه وکړي.
د فبروري ۱۱مه په علم کې د ښځو او نجونو د نړیوالې ورځې په توګه هرکال نمانځل کېږي.
د دې ورځې هدف د ښځو او نجونو د علمي فعالیتونو ملاتړ، په زده کړو او ساینس کې د ددوی د رول د پراختیا هڅول او د جنسیتي توپیرونو کمول دي.
افغانې ښځې او نجونې له څلورو کلونو راهیسې چې طالبان واک ته رسېدلي، له شپږم ټولګي پورته د زده کړو له ترلاسه کولو محرومې کړای شوي دي.
طالبانو ویلي و، چې دغه بندیز تر دویم امر پورې نافذ دی، خو په دې وروستیو کې دې ډلې د نجونو د زده کړو مساله له بحثونو بهر کړې او په دې تړاو یې هر ډول بحث او خبرې اترې منع کړې دي.
د ایران د حکومت یوه جګپوړي چارواکي د چارشنبې په ورځ وویل چې د ایران د توغندیو وړتیاوې د تهران سره کرښه ده او له امریکا سره په دې اړه خبرې نه کوي. د ایران دولتي رسنیو د علي شمخاني له قوله وویل: «د اسلامي جمهوریت د توغندیو وړتیاوې د خبرو برخه نه دي».
هغه د اسلامي انقلاب د ۴۷مې کلیزې په مراسمو کې دا څرګندونې وکړې.
د امریکا او ایران ډیپلوماتانو تیره اونۍ په عمان کې غیر مستقیمې خبرې وکړې.
واشنګټن له اوږدې مودې راهیسې هڅه کوي چې د ایران د اتومي وړتیاوو په اړه خبرې د دغه هېواد د توغندیو پروګرام ته هم وغځوي. ایران ویلي چې د بندیزونو د رفع کولو په بدل کې د اتومي پروګرام په محدودولو بحث ته چمتو دی.
تمه ده چې د اسراییل لومړی وزیر بنیامین نتانیاهو د چارشنبې په ورځ په واشنګټن کې له ټرمپ سره په لیدنه کې هڅه وکړي چې د امریکا-ایران هر ډول تړون کې د تهران پر توغندیو محدودیتونه هم شامل کړي.
د یکشنبې په ورځ د ایران د بهرنیو چارو وزیر عباس عراقچي وویل چې د تهران د توغندیو پروګرام هیڅکله د خبرو اجنډا برخه نه وه.
د عزیزي شرکت رییس میرویس عزیزي وايي، چې په نږدې راتلونکې کې به د شاوخوا ۳۰۰۰ مېګاواټه برېښنا د تولید لپاره یو بل لوی تړون هم لاسلیک شي.
عزیزي په کابل کې د طالبانو له برېښنا شرکت سره د پنځو پروژو د تړونونونو د لاسلیکولو پرمهال وویل، چې د دوی تخنیکي ټیمونو اړوند تجهیزات او وسایل پېرلي او ټولې دستګاوې د پروژو د عملي کارونو لپاره چمتو دي.
عزیزي وویل، چې که د ټاپي پروژې ځینې مسایل اوار شي، نو په هرات کې به هم د ګازي برېښنا د تولید چارې پیل شي.
د عزیزي شرکت د چارواکو په وینا، د لمریزې برېښنا پروژې به په دوو کلونو کې بشپړې او ګټې اخیستنې ته وسپارل شي، خو د ډبرو سکرو پروژو بشپړېدل به درې کاله وخت ونیسي.
دواړې خواوې په دې باور دي، چې د دغو پروژو پلي کېدل به نه یوازې د افغانستان د برېښنا کمی پوره کړي، بلکې زرګونو کسانو ته به د کار زمینه هم برابره کړي.
د عزیزي ګروپ مشر میرویس عزیزي وویل، چې افغان سوداګر د کارخونو د جوړولو لپاره ۲۴ ساعته برېښنا ته اړتیا لري.
د عزیزي په وینا، تر څو چې افغانستان د برېښنا له اړخه پر ځان بسیا نه شي، صنعتي وده او اقتصادي ثبات محدود پاتې کیږي.
د طالبانو تر کنټرول لاندې د افغانستان برېښنا شرکت او د عزیزي انرژۍ پانګونې شرکت ترمنځ د برېښنا تولید د پنځو سترو پروژو د عملي چارو د پیل رسمي تړونونه لاسلیک شول.
دغه تړونونه نن د سلواغې په ۲۲مه د طالبانو د ریاستالوزرا اقتصادي مرستیال ملا عبدالغني برادر په حضور کې لاسلیک شول.
د هوکړې له مخې، عزیزي خصوصي شرکت به په هېواد کې د ۸۴۵ مېګاواټه برېښنا د تولید لپاره په بېلابېلو ولایتونو کې نوې پروژې پلې کړي، چې ډېره برخه به یې د لمریزې یا سولر انرژۍ له لارې تولیدېږي.
د عزیزي خصوصي شرکت د پلان له مخې به د کابل ولایت د نغلو سیمه کې د زر مېګاواټه لمریزې برېښنا فابریکه جوړه شي
دغه راز د پروان ولایت په باریکاب کې د ۱۰۰ مېګاواټه لمریزې برېښنا، په غزني کې د ۱۳۰ مېګاواټه سولر برېښنا او په تخار کې ۱۶۵ مېګاواټه ډبرو سکرو برېښنا پروژې هم پکې شاملې دي.
په دغو پروژه کې یوه هم په بغلان ولایت کې د ۳۵۰ مېګاواټه په ظرفیت د ډبرو سکرو ستره برېښنایي پروژه هم شامله ده.
د یادو پروژو ټولټال لګښت شاوخوا ۴۶۳ میلیونه امریکايي ډالر اټکل شوی، چې عزیزي شرکت پرې پانګونه کوي.
د ملګرو ملتونو د بندیزونو د څارنې ټیم په تازه راپور کې راغلي چې طالبان د ترهګریزو ډلو د فعالیتونو ملاتړ کوي، چې مختلفې وسله والې ډلې پکې شاملې دي او ځینې مشران یې په کابل کې اوسیږي.
په یاد راپور کې راغلي، چې القاعده، تحریک طالبان پاکستاناو د ختیځ ترکستان اسلامي غورځنګ د طالبانو تر واک لاندې سیمو کې دي. د راپور له مخې، د القاعدې ځینې لوړپوړي غړي لکه اسامه محمود او د هغه مرستیال یحیی غوري په کابل کې اوسیږي.
د ملګرو ملتونو د بندیزونود څارنې او ارزونې ټیم شپږ میاشتنی راپور چې امنیت شورا ته وړاندې شوی، ښيي چې القاعده لا هم د طالبانو ملاتړ لري او په افغانستان کې د جنګیالیو د روزنې او هغوی ته د سلا مشورې په برخه کې فعالیت کوي.
راپور څرګندوي چې د هند نیمه لویې وچې لپاره د القاعدې څانګه د افغانستان په جنوب ختیځ کې فعاله ده او ددې ډلې مشر اسامه محمود او مرستیال یحیی غوري په کابل کې حضور لري او رسنیز ټیم یې په هرات کې فعالیت کوي.
امریکا د اسامه محمودپه اړه د معلوماتو د ورکولو لپاره ۱۰ میلیونه ډالر جایزه ټاکلې او د یحیی غوري پر سر یې پنځه میلیونه ډالر ټاکلي دي.
په راپور کې راغلي چې تحریک طالبان پاکستان د طالبانو له لوري په افغانستان کې له زیاتې ازادۍ او ملاتړ نه برخمن دي او دغه چلند د تحریک طالبان پاکستان پر وړاندې د پاکستان بریدونه ډېر کړي دي.
راپور تاکید کوي چې د ختیځ ترکستان اسلامي غورځنګ غړي هم د طالبانو له لوري د هویت اسناد ترلاسه کړي او په افغانستان کې د تګ راتګ ازادي لري، او د بدخشان ولایت په کچه د تاریاکو د کرنې او د کانونو له لارې مالي تمویل ترلاسه کوي.
ملګرو ملتونو اعلان کړی چې د ختیځ ترکستان اسلامي غورځنګ شاوخوا ۲۵۰ غړي په ۲۰۲۵ کال کې د طالبانو له پولیسو سره یو ځای شوي دي.
په راپور کې د ملګرو ملتونو یوه غړي هېواد له قوله راغلي چې ختیځ ترکستان اسلامي غورځنګ خپلو غړو ته چې په سوریه او ګاونډیو هېوادونو کې دي، ویلي چې د « سنکیانگ جهاد» لپاره افغانستان ته انتقال شي.
راپور څرګندوي چې داعش خراسان د افغانستان په شمال په ځانګړي توګه په بدخشان او له پاکستان سره نږدې سیمو کې فعال دی.