ملک سلمان خیریه بنسټ افغاني سرې میاشتې ته ۱۰۰ ټنه خرما وسپارله
د سعودي عربستان ملک سلمان خیریه مرکز د روژې میاشتې په مناسبت او د اړمنو کورنیو د ملاتړ لپاره، د طالبانو تر واک لاندې سرې میاشتې ټولنې ته۱۰۰ ټنه خُرما وسپارله.
د سعودي عربستان ملک سلمان خیریه مرکز د روژې میاشتې په مناسبت او د اړمنو کورنیو د ملاتړ لپاره، د طالبانو تر واک لاندې سرې میاشتې ټولنې ته۱۰۰ ټنه خُرما وسپارله.
دغه مرسته د سعودي عربستان د سفارت مرستیال علي محمد الحصان او د ملک سلمان د مرستو د مرکز مشر فهاد سعد القحطاني له خوا سرې میاشتې ته سپارل شوې.
د طالبانو د افغاني سرې میاشتې مسوولانو د سعودي عربستان له مرستو مننه کړې او ډاډ یې ورکړی چې مرسته به په بشپړ شفافیت سره وویشل شي.
د سفارت مرستیال هم وویل چې هېواد به یې تل د افغانانو ملاتړ ته ژمن وي او د بشردوستانه مرستو د پراختیا هڅې به دوام ومومي.
د پخواني حکومت د بهرنیو چارو وزارت سیاسي معیین جاوېد لودین کابل ته تللی او د طالبانو ادارې او د عزیزي انرژۍ شرکت ترمنځ د برېښنا د تولید د تړون د لاسلیکولو په مراسمو کې یې ګډون کړی دی. د راپورونو له مخې، لودین دا مهال د افغان سوداګر میرویس عزیزي اړوند شرکتونو کې کار کوي.
په هغو انځورونو کې چې د طالبانو ارګ او عزیزي ګروپ د چارشنبې په ورځ، د سلواغې پر۲۲مه، د تړون د لاسلیک له مراسمو خپاره کړي، جاوېد لودین د عزیزي ګروپ د غړو ترڅنګ له ملا برادر سره په ناسته کې لیدل کیږي.
جاوېد لودین د حامد کرزي د حکومت پر مهال د ولسمشر ویاند، د ولسمشر د دفتر رییس او په کاناډا کې د افغانستان سفیر پاتې شوی دی.
نوموړي په ۱۳۹۱ کال کې، چې د بهرنیو چارو وزارت سیاسي مرستیال و، په واشنګټن کې له امریکايي چارواکو سره په یوه ناسته کې غوښتنه کړې وه چې طالبان دې د ترهګرو ډلو په نوملړ کې شامل شي.
هغه مهال لودین ویلي وو، چې طالبان افغانستان ته ځانمرګي بریدګر لېږي او ملکي وګړي وژني، نو باید د ترهګرو په توګه وپېژندل شي.
د طالبانو د ریاست الوزرا اقتصادي معاونیت د چارشنبې په ورځ اعلان وکړ چې د عزیزي انرژۍ شرکت له لوري په افغانستان کې د برېښنا د تولید د پنځو پروژو عملي چارې پیل شوې دي.
لودین په دغو مراسمو کې د عزیزي شرکتونو د کارکوونکي په توګه ګډون کړی و.
په پېښور کې د پښتونخوا د زده کوونکو فدراسیون په غونډه کې د پښتونخوا نشنل عوامي ګوند شریک مشر مختار خان یوسفزي ویلي، چې په افغانستان کې د ترهګرۍ لامل د پاکستان بهرنی سیاست دی او افغان او پاکستاني ترهګر ټول په پاکستان کې تولید شوي دي.
د پښتونخوا نشنل ګوند ګوند شریک مشر مخترخان یوسفزي د چارشنبې په ورځ، د سلواغې پر ۲۲مه، په پېښور کې د پښتونخوا د زده کوونکو سازمان په غونډه کې د وینا پرمهال وویل، چې ددغو سیاستونو په پایله کې د افغانستان نیمايي نفوس، ښځې او نجونې، له زده کړو بې برخې دي او پر خلکو د کار او اقتصاد لارې بندې دي.
په غونډه کې د عوامي نشنل ګوند ایالتي اسمبلۍ غړي نثار باز، د قومي وطن ګوند استازي او د باړې پاڅون مشر او د پېښور پوهنتون استادانو هم ویناوې وکړې.
مختار یوسفزي په خپلو خبرو کې وویل، چې په پاکستان کې واکمنه ډله، چې ده پنجاب وباله، پښتانه په خپلو پښو درېدو ته نه پرېږدي.
د نوموړي په وینا، د اسلام اباد بهرنی سیاست په افغانستان کې پر ستراتیژيک عمق ولاړ دی او په کور دننه د پښتنو د محکومیت سیاست پرمخ وړي.
په غونډه کې ویل شوی چې اوسنۍ ترهګري د پاکستان د بهرنیو ناسمو سیاستونو پایله ده او بنسټیز هدف یې دادی چې افغانستان په خپلو پښو ولاړ نه وي او په پښتونخوا کې ملي شعور وده ونه کړي او خلک په خپلو طبیعي سرچینو واکمن ونه اوسي.
یو سند چې ښکاري د بریټانیا پخواني شهزاده اندرو ماونټبېټن وېنډزر د جنسي قضیو مخکښ جېفري اپسټین ته استولی، په افغانستان، په ځانګړې توګه هلمند کې د سرو زرو او یورانیمو د پانګونې فرصتونو په اړه معلومات پکې شامل دي.
بيبيسي هغه معلوماتي راپور لیدلی چې د بریتانیا چارواکو هغه مهال اندرو ته چمتو کړی و.
دغه مهال نوموړی د سوداګرۍ استازی و او ده دا راپور د ۲۰۱۰ کال په ډسمبر کې محکوم شوي جنسي مجرم اپسټین ته لېږلی و.
په دغه سند کې د هلمند ولایت د «لوړ ارزښته سوداګریزو فرصتونو» نوملړ هم شامل دی.
اندرو مخکې له دې له اپسټین سره د خپلو اړیکو په تړاو هر ډول ناسم کار په کلکه رد کړی او دا ادعا یې هم رد کړې چې ګواکې د سوداګرۍ استازي په توګه یې خپله دنده د شخصي ګټو لپاره کارولې وي.
په یاد سند کې د هلمند ولایت اقتصادي وضعیت، بازار موندنه او د پانګونې فرصتونه په تفصیل سره تشریح شوي دي.
دغه راز په سند کې د قیمتي منرالونو لکه سرو زرو، یورانیم، توریم، اېریډیم او مرمرو زیرمو یادونه شوې او ویل شوي چې د ټیټ لګښت استخراج امکان هم شته. همداراز د تېلو او ګازو احتمالي سرچینو ته هم اشاره شوې ده.
راپور زیاتوي چې د لښکرګاه او ګرشک ښارونو کې د صنعتي پارکونو او خوندي سوداګریزو سیمو د جوړولو چارې روانې وې او د بست هوايي ډګر د موقعیت له امله دغه سیمه د سیمهییزې سوداګرۍ لپاره مناسبه بلل شوې وه.
د اسنادو له مخې، شهزاده انډریو دغه معلومات په خپل ایمیل کې «محرم راپور» بللی و.
بيبيسي وایي، یوازې د افغانستان اسناد نه، بلکې د سنګاپور، هانګ کانګ او ویتنام د سفرونو رسمي راپورونه هم اپسټین ته لېږل شوي دي.
ځینې ایمیلونه دا احتمال هم ښيي چې نور «زیپ فایلونه» چې ګڼ شمېر اسناد پکې وي، هم ورسره شریک شوي دي.
د هغه وخت د برېټانیا د سوداګرۍ وزیر سر وینس کېبل د دې قضیې په اړه ویلي چې د محرمو حکومتي معلوماتو شریکول «ډېر ناسم او د اندېښنې وړ چلند» دی.
د شهر بانو سادات فلم «ښه سړی نشته» د جرمني د برلین د «برلیناله فېسټیوال» پرانېستونکی فلم دی. فلم جوړوونکې د طالبانو له ګواښونو تښتېدلې او اوس په هامبورګ کې ژوند کوي. نوموړې ویلي، چې له افغانستان نه ټول خلک په تېښته کې دي.
شهربانو سادات د جرمني ټاګیس شپیګل مجلې ته په مرکه کې ویلي، چې په افغانستان کې چې نوموړې څوک پېژني، هغوی ټول له هېواد نه د تېښتې لارې چارې ګوري.
هغې په ۲۰۲۱ کال کې پر کابل د طالبانو له واکمنېدو وروسته افغانستان پرېښود او له هغه وخت راهیسې د جرمني په هامبورګ کې اوسیږي.
هغې په دې اړه د یوې پوښتنې په ځواب کې وویل، « زه د ایران په تهران کې د کډوالې په توګه زیږیدلې یم، ځکه زما مور و پلار په ۷۰مو کلونو کې د شوروي-افغان جګړې له ویرې ایران ته تللي وو او په ایران کې د افغان کډوالو پر وړاندې لوی تبعیض شته دی. تل به یې زه «افغانۍ» بللم.
نوموړې وايي، کله چې ۱۱ کلنه وه او په ۲۰۰۱ کې افغانستان ته ستنه شوه، هلته خلکو ایرانۍ بلله.
خو نوموړې وايي، چې په افغانستان کې یې هڅه کوله ځان افغانه ثابته کړي، خو داسې یې انګیرله چې په هیڅ ځای پورې اړه نه لري.
نوموړې د جرمني تجربه هم ورته بللې او وايي، چې له دې ټولو سره سره ددې لپاره دا یو ډول ازادي ده، چې په هر نامه بلل کیږي، خو چې ازاده واوسي.
د پاکستان د بهرنیو چارو وزارت د چارشنبې په ورځ خبر ورکړ چې په کندهار او مزارشریف کې یې خپلو کونسلګرو ته دوه نوي مسوولان ټاکلي دي. د پاکستان حکومت دغه راز په نورو هېوادونو کې هم ۱۹ سفیران او د کونسلګریو مسوولان معرفي کړي دي.
د پاکستان د بهرنیو چارو وزیر د چارشنبې په ورځ، د سلواغې پر ۲۲مه اعلان وکړ، چې د افغانستان په ګډون یې په ګڼو هېوادونو کې خپل ۱۹ سفیران او د کونسلګریو نوي مسوولان ټاکلي دي.
د یاد وزارت په وینا، دا ټاکنې د دغه هېواد د لومړي وزیر شهباز شریف په هوکړه شوې دي.
د دې پرېکړې له مخې، شهباز حسین او اویس احمد خان په کندهار او مزارشریف کې د پاکستان عمومي کونسلانو په توګه معرفي شوي دي.
پاکستان په بنکاک، برلین، دارالسلام، دوشنبه، جنیوا، کامپالا، کټمنډو، لندن، نایروبي، اوسلو، استکهلم، تاشکند او تهران کې هم ۱۳ سفیران او په فرانکفورت، ګوانګژو، لاس انجلس او مونټریال کې څلور کونسلان ټاکلي دي.
د پاکستان د بهرنیو چارو وزیر محمد اسحاق ډار هیله څرګنده کړې چې د پاکستان استازي به په بهر کې په شفافه توګه خپل ماموریت وکړي او پر اقتصادي ډیپلوماسۍ د تمرکز له لارې به د پاکستان ملي ګټې پرمخ بوځي.
دا ډیپلوماتیک اقدام په داسې وخت کې کېږي چې د تېرو میاشتو په ترڅ کې د طالبانو او اسلام اباد ترمنځ اړیکې ترینګلې شوې دي.
پاکستان څو ځله طالبان تورن کړي چې ترهګرو ډلو ته پناه ورکوي، خو طالبانو تل دغه ادعاوې رد کړې دي.