د امریکا د متحده ایالاتو د کانګرس د بهرنیو چارو کمېټې د ډېموکرات ګوند استازو امریکا ته د وړ افغانانو د لېږد بهیر پر درېدو نیوکه کړې او دا یې غېراخلاقي او د امریکا د ګټو او ارزښتونو پر خلاف بللی دی.
له دې سره، د کانګرس د ډېموکراتانو له فشارونو سره سره د امریکا د بهرنیو چارو وزارت یوه جګپوړي چارواکي د چهارشنبې په ورځ وویل، چې د ټرمپ حکومت لسګونه افغان کډوال درېیمو هېوادونو ته چې ډېری یې په افریقا کې دي، لېږدوي.
د ډېموکرات استازو یوې ډلې د چهارشنبې په ورځ په واشنګټن کې د یوې ناستې پر مهال، په افغانستان او د سیمې په هېوادونو کې د متحده ایالاتو د زرګونو پخوانیو همکارانو او کارکوونکو پرېښودل «غېراخلاقي» عمل وباله او دا یې د امریکا له بنسټیزو ارزښتونو سره په ټکر کې وبلل.
د ډېموکرات ګوند استازي کاملاګر-دو او د دې ناستې کوربه ټینګار وکړ: «د جګړې له پخوانیو سرتېرو او افغان همکارانو سره د شویو ژمنو پر ځای کول ګوندي موضوع نه ده، بلکې د امریکا له ملي اعتبار سره تړاو لري». هغه خبرداری ورکړ، چې د دغو کسانو له ملاتړ څخه پاتې راتلل به د نړۍ له لوري د متحده ایالاتو پر ژمنو د باور لهمنځه تلو لامل شي.
په همدې تړاو، د کانګرس یو بل استازي د وړ افغانانو د لېږد د دوسیې د څنډې کېدو په اړه د اندېښنې په څرګندولو سره وویل، هغه کسان چې یوه ورځ یې د امریکايي سرتېرو ژوند ژغورلی و، اوس تر بل هر وخت ډېر د ملاتړ او سمدستي لېږد اړتیا لري.
هغه د ټرمپ په حکومت کې د کډوالۍ د محدودیتونو سختېدو ته په اشارې سره خبرداری ورکړ، چې د دغو کډوالو جبري ستنول به هغوی د شکنجې او مرګ له مستقیم ګواښ سره مخ کړي.
د امریکا د بهرنیو چارو وزارت د مرستیال استازي پاول کپور د چهارشنبې په ورځ د استازو جرګې د بهرنیو اړیکو د فرعي کمېټې په یوه ناسته کې اعلان وکړ، هغه افغانان چې قطر او اماراتو ته لېږدول شوي، ټاکل شوې ده چې درېیمګړو هېوادونو ته ولېږدول شي.
دا کړنلاره د اسیايي او افریقایي هېوادونو څخه د پناه غوښتونکو د منلو کمولو په موخه د ټرمپ د حکومت د پالیسیو په چوکاټ کې غوره شوې ده. اوس مهال د افغانستان په ګډون د لسګونو هېوادونو وګړي امریکا ته د سفر د بندیز په لېست کې شامل دي؛ دا هغه بندیز دی چې په افغانستان کې د امریکا د پوځ پخواني همکاران هم پهکې راځي.
د «افغاناېواک» سازمان یوې مسوولې او د پوځ پخوانۍ سرتېرې جسیکا برډلي راشینګ امریکا ته د افغان همکارانو د لېږد پروسې بشپړ درېدو ته په اشارې سره چې د ۲۰۲۵ کال له جنورۍ څخه پیل شوی، وویل: «په تېرو څلورو کلونو کې (د ټرمپ تر حکومت وړاندې)، نږدې ۲۰۰ زره افغانان امریکا ته لېږدول شوي وو، خو اوس دا بهیر په بشپړ ډول درېدلی دی».
د دغه سازمان د شمېرو لهمخې، شاوخوا ۲۱۲ زره په شرایطو برابر کسان د افغانستان دننه او ۶۰ زره نور د نړۍ په څه باندې ۹۰ هېوادونو کې په بېبرخلیکه حالت کې شپې او ورځې تېروي.
دا په داسې حال کې ده، چې په دغه ناسته کې د امریکايي ځانګړو ځواکونو پخواني ژباړن ضیا غفوري د دې ځواکونو د پخوانیو افغان همکارانو وضعیت غمجن وباله. هغه وویل، چې ډېری دا کسان له پرلهپسې ګواښونو سره مخ دي؛ د بېلګې په توګه هغه کسان چې د طالبانو له ډاره ګاونډیو هېوادونو ته تللي، د اېستلو په صورت کې نیول کېږي او شکنجه کېږي.
پخوانۍ امریکایۍ سرتېرې کایلین هانټر له خپلو پخوانیو افغان همکارانو سره د واشنګټن ژمنه «ژوره، اخلاقي او د نه بحث وړ» وبلله. هغې ټینګار وکړ، چې دغو کسانو د امریکایي سرتېرو تر څنګ اوږه په اوږه جګړه کړې او نباید په دې ستونزمنو شرایطو کې یوازې پرېښودل شي.
