فرح پهلوي: زرګونه ځوانان لاهم د ایران په زندانونو کې د ظلم او بېعدالتیو ښکار دي
د ایران د پخواني پاچاه مېرمنې فرح پهلوي د ایران په لاریونونو کې د قربانیانو له کورنیو سره د خواخوږۍ څرګندولو ترڅنګ ویلي، چې زرګونه ځوانان د ایران په زندانونو کې له سختې بېعدالتۍ سره مخ دي.
هغې د ازادۍ غوښتونکو زړورتیا ستایلې او ټینګار یې کړی، چې د ظلم پر وړاندې مبارزه به د ایران راتلونکی روښانه کړي. فرح پهلوي پر اېکس پاڼه لیکلي، چې په دې سختو ورځو کې د وژل شویو کسانو د کورنیو غم تل ورسره دی او ځان د هغوی په کړاو کې شریک بولي.
هغې زیاته کړې، چې د ټولو ټپيانو ژر رغېدو او خپلو کورنیو ته د بېرته ستنېدو هیله لري. اغلې پهلوي لیکلي، چې لاهم ګڼ ځوانان په زندانونو کې د ظلم او بېعدالتیو ښکار دي او فکر یې تل له هغوی سره دی.
نوموړې په دغه څرګندونو کې د ایران په وروستیو لاریونونو کې د خلکو د وژنې، ټپي کېدو او د بندیانو د کړاوونو په اړه د نړۍوالې پاملرنې غوښتنه هم کړې ده.
