د ۲۰۲۶کال اسیا جام فوتسال سیالیو له پای ته رسېدو وروسته چې په اندونیزیا کې ترسره شوې، د اسیا د فوټبال کنفدراسیون د دغه سیالیو د ۸غوره ګول وهونکو نوملړ اعلان کړ او له مینهوالو یې وغوښتل چې د خپلې خوښې لوبغاړي ته رایه ورکړي. په نوملړ کې د افغان لوبغاړي رضا حسینپور ګول هم شامل دی.
دغه سیالۍ چې څو ورځې وړاندې پای ته ورسېدې، د ۱۶۶ ګولونو په وهلو سره یې د دغه ټورنمنټ په تاریخ کې تر ټولو ډېر ګولونه ثبت کړي دي. په پای کې د ایران لوبډلې خپله ۱۴مه اتلولي خپله کړه.
په ټاکل شویو ګولونو کې د سیالیو تر ټولو چټک ګول هم شامل دی. هغه مهال چې دین کونګ وېن د لبنان او ویتنام ترمنځ لوبه کې د سیالۍ له پیل یوازې ۱۹ ثانیې وروسته یې د سیالې لوبډلې دروازه خلاصه کړه.
د کویټ پر وړاندې د ټایلنډ د محمد عثمانموسی ګول هم د غوره ګولونو په ډله کې راغلی دی. همدارنګه د افغانستان رضا حسینپور د چټکې تېښتې او ښکلې «چیپ ضربې» پر مټ وهل شوی ګول د ټورنمنټ یو له یادګاري ګولونو په توګه ثبت شوی.
په پای کې د ایران پر وړاندې په نیمهپایلوبه کې د عراق د سالم کاظم ګول او د اندونیزیا اسرا مگانتارا ګول د ۲۰۲۶ اسیا جام فوتسال د اتو غوره ګولونو نوملړ کې راغلي دي.
د اسیا د فوټبال کنفدراسیون له مینهوالو غوښتي، چې د «AFC» رسمي وېبپاڼې له لارې د خپلې خوښې ګول ته رایه ورکړي.
