منظور پښتین په سوات کې د پښتون ژغورنې غورځنګ د مخکښ غړي پر وژلو خواشني ښودلې
تېره ورځ مازدیګر مهال د خیبر پښتونخوا په سوات ولسوالۍ کې د دې ولسوالۍ لپاره د یاد غورځنګ مشر عطاءالله جان په خپل کلي کې د ماشومانو د شخړې د هواري پرمهال په ډزو ووژل شو. د غورځنګ مشر منظور احمد پښتین پر یاده پېښه خواشیني ښودلې او نوموړی یې د مظلوم یو رسا غږ یاد کړی.
منظور پښتین د پنجشنبې په ورځ (د سلواغې ۲۲مه) په سوات کې د دې غورځنګ د غړي عطاء الله جان په اړه ویلي: «د پي ټي ایم مخکښ، د ادب او شاعرۍ د ډګر ځلانده ستوری، د بې وسه او مظلومانو تکړه وکيل، د سوات پاڅونونو ترجمان او د ولسونو مل، ژبپوهه، زما نزدې ملګری پوهاند عطاوالله جان په سوات کي پخپل کلي کي د يوې شخړې د جوړجاړي په هڅو کي د يوه فریق له خوا په ډزو ټپي شو، او وروسته ئې په روغتون کي د نړۍ څخه د تل لپاره سترګې پټې کړې.»
په دې پېښه کې اته کسه نور ټپیان شوي چې په ټپیانو کې د عطاءالله جان وراره هم شامل دی.
عطاءالله جان د پښتون ژغورنې غورځنګ د خیبر پښتونخوا د قامي کمېټې غړی او د سوات د پښتون قامي جرګې مشر هم پاتې شوی و.
