د ملګرو ملتونو د خوړو او کرنې سازمان (ایف ای او) اعلان کړی چې د ماشومانو د ملاتړ صندوق (یونیسف) او د فرانسې حکومت په ګډه په ختیځ افغانستان کې له وروستیو زلزلو ځپلو کورنیو سره د خوړو خوندیتوب او د ښځو او ماشومانو د خوارځواکۍ د کمولو لپاره دوه میلیونه یورو ځانګړې کړې دي.
دغه سازمان نن پنجشنبه د سلواغې په ۲۳مه، په خپور کړي راپور کې ویلي چې یاده مرسته به د زلزلهځپلو ټولنو سره مرسته وکړي څو د خوړو خوندیتوب بېرته ورغوي، د خلکو تغذیه ښه کړي او د عاید سرچینې خوندي وساتي.
د راپور له مخې، دا پروژه د فرانسې له لوري د خوړو خوندیتوب او تغذیې موسسیې (FIFSAN) تر چتر لاندې تمویلېږي.
د یادې پروژې موخه د کورنیو د خوړو د تولید پیاوړتیا، مغذي خوړو ته د لاسرسي ښه کول، اساسي خدمتونو ته په ځانګړي ډول د ښځو او ماشومانو ترمنځ د لاسرسي پراخول او د خوارځواکۍ کمول دي.
ټاکل شوې چې دا پروګرام په کنړ ولایت کې د څوکۍ او نورګل ولسوالیو او په ننګرهار ولایت کې د درهنور ولسوالۍ کې پلی شي.
د ایف ای او په وینا، له دې پروژې څخه به ۵۱ زره او ۸۷۰ کسان په مستقیم ډول ګټه واخلي، او نږدې ۱۹۰ زره نور کسان به هم په غیرمستقیم ډول ترې برخمن شي.
همدا ډول، د فرانسې د اروپا او بهرنیو چارو وزارت د نړیوالو همکاریو مشرې ویلي چې د خوارځواکۍ له منځه وړل د فرانسې له لومړیتوبونو څخه دي. هغې زیاته کړې چې دا پروژه ښيي، نړیواله ټولنه کولای شي د افغانانو، په ځانګړي ډول د زیانمنو ښځو او ماشومانو لپاره عملي حللارې وړاندې کړي.
په همدې حال کې د یونیسف استازي ډاکټر تاجالدین اویوال خبرداری ورکړی چې په افغانستان کې ډېر ماشومان د خوارځواکۍ له ګواښ سره مخ دي، چې نږدې ۸۰ سلنه یې تر دوو کلونو کم عمره ماشومان دي. هغه ټینګار کړی چې د زلزلو او پرلهپسې بحرانونو وروسته د مغذي خوړو او درملنې اړتیا لا پسې زیاته شوې ده.
