د خېبر پښتونخوا د باجوړ ولسوالۍ په ماموندو کې د یوه کور د خونې چت پرېوتو له امله یوه ښځه او دوه ماشومانې مړې شوې او یوه بله ښځه ټپي شوې ده. ځايي اوسېدونکي وایي، د وروستیو سختو بارانونو له کبله د دغه خټین کور چت راپرېوتی دی.
ځايي خلکو ویلي، په مړو شویو کسانو کې د دغه کور د څښتن مور او د هغه دوه کم عمره لوڼې شاملې دي؛ خو د نوموړي مېرمن په سخت ټپي حالت کې د ښار مرکزي روغتون ته لېږدول شوې ده.
وسله والو د خیبر پښتونخوا په دېره اسماعیل خان کې د چارشنبې په ورځ پنځه پولیس وژلي دي. د پولیسو په وینا، برید د ښار په څنډو کې د وسلهوالو پر ضد له عملیاتو وروسته د پولیسو د ستنېدو پرمهال شوی.
د پولیسو په خبرپاڼه کې ویل شوي چې وسلهوالو، چې په یوه ځنګل کې پټ وو، د پولیسو پر ګزمې ډزې وکړې.
خبرپاڼه زیاتوي چې پولیسو په متقابل برید کې څلور وسلهوال هم ووژل.
تر اوسه هېڅ ډلې د دغه برید مسوولیت نه دی منلی.
په پېښور کې د پښتونخوا د زده کوونکو فدراسیون په غونډه کې د پښتونخوا نشنل عوامي ګوند شریک مشر مختار خان یوسفزي ویلي، چې په افغانستان کې د ترهګرۍ لامل د پاکستان بهرنی سیاست دی او افغان او پاکستاني ترهګر ټول په پاکستان کې تولید شوي دي.
د پښتونخوا نشنل ګوند ګوند شریک مشر مخترخان یوسفزي د چارشنبې په ورځ، د سلواغې پر ۲۲مه، په پېښور کې د پښتونخوا د زده کوونکو سازمان په غونډه کې د وینا پرمهال وویل، چې ددغو سیاستونو په پایله کې د افغانستان نیمايي نفوس، ښځې او نجونې، له زده کړو بې برخې دي او پر خلکو د کار او اقتصاد لارې بندې دي.
په غونډه کې د عوامي نشنل ګوند ایالتي اسمبلۍ غړي نثار باز، د قومي وطن ګوند استازي او د باړې پاڅون مشر او د پېښور پوهنتون استادانو هم ویناوې وکړې.
مختار یوسفزي په خپلو خبرو کې وویل، چې په پاکستان کې واکمنه ډله، چې ده پنجاب وباله، پښتانه په خپلو پښو درېدو ته نه پرېږدي.
د نوموړي په وینا، د اسلام اباد بهرنی سیاست په افغانستان کې پر ستراتیژيک عمق ولاړ دی او په کور دننه د پښتنو د محکومیت سیاست پرمخ وړي.
په غونډه کې ویل شوی چې اوسنۍ ترهګري د پاکستان د بهرنیو ناسمو سیاستونو پایله ده او بنسټیز هدف یې دادی چې افغانستان په خپلو پښو ولاړ نه وي او په پښتونخوا کې ملي شعور وده ونه کړي او خلک په خپلو طبیعي سرچینو واکمن ونه اوسي.
د خیبر پښتونخوا اعلی وزیر سهیل اپریدي ویلي چې په تېرو ۷۸ کلونو کې پښتنو ته په تدریسي نصاب کې ټ ټوپک ښوول شوی خو اوس وخت راغلی چې ځوانانو ته (ق قلم) ور زده شي. اپریدی وايي، چې د پاکستان ملي رسنۍ پر پښتنو کېدونکي ظلمونه نه منعکسوي.
نوموړي دا خبرې د چارشنبې په ورځ، د سلواغې پر ۲۲مه په خیبر ولسوالۍ کې یوې غونډې ته د وینا پر مهال وکړې.
د خیبر پښتونخوا اعلی وزیر وویل چې د خیبر پښتونخوا ولس غیرتي او زړور دی خو ناپوه نه دی.
هغه څرګنده کړه، چې د ایالت ولس به د هرې هغې پالیسۍ پر ضد پاڅون کوي چې د دوی حقونه او ګټې پکې زیانمنیږي.
سهیل اپریدي د پاکستان پر ملي رسنیو، چې په غوڅ ډول انګریزي او اردو ژبې دي، نیوکه وکړه او ویې ویل چې «دغه رسنۍ دي او که د ن لیګ رسنۍ»، ځکه دده په وینا، د خیبر پښتونخوا ولس خپل ولس نه ګڼي.
نوموړي شکایت وکړ چې د پاکستان مشهورې رسنۍ د خیبر پښتونخوا پر ولس کېدونکي ظلمونه نه ښيي خو ویې ویل، چې «که دغه رسنۍ رښتیا نه شي منعکس کولای، نو لږ تر لږه دې درواغ هم نه ښيي».
د پاکستان د تحریک انصاف ګوند له بنسټګر عمران خان سره د لیدنې په اړه سهیل اپریدي وویل چې د لیدنې لپاره ټول شرطونه پوره کړل شوي خو بیا هم د لیدنې کتنې اجازه نه ورکول کېږي.
هغه خبرداری ورکړ چې که د قانون له مخې د غوښتنو پوره کولو باوجود د لیدنې وخت ورنه کړل شو، نو لاریون به کېږي.
نوموړي له خیبر پښتونخوا سره د مدغم شویو ولسوالیو د ټولو کالجونو لپاره د وړیا ټرانسپورټ اعلان هم وکړ.
د عوامي نشنل ګوند مشر اېمل ولي خان وایي، د پاکستان پخوانی لومړی وزیر عمران خان خپله یو لوی ترهګر دی او پاکستاني طالبانو ته یې چندې ورکولې. هغه زیاتوي، چې ده لس کاله وړاندې د پاکستان دې پخواني لومړي وزیر ته د «طالبان خان» نوم ورکړی و.
د عوامي نشنل ګوند مشر اسلاماباد کې خبریالانو ته زیاته کړې، چې عمران خان طالبانو ته د دفترونو غوښتنې کولې او له دغه وسلهوالو ډلو نه یې ملاتړ کاوه. نوموړي وویل: «عمران خان د ترهګرو وفادار دی، هغه یې وکیل دی او نظریات یې هم د ترهګرو دي». د هغه په خبره، د پاکستان څارګره شبکه ایاېسای او ټيټيپي سره یو ډول دي.
د هغه دا څرګندونې داسې مهال دي، چې په خېبرپښتونخوا کې ورځ تر بلې ناامنۍ ډېرېږي او یو شمېر ګوندونه یې پړه په دې ایالت کې له تېرې یوې لسیزې د تحریک انصاف واکمن ګوند ته نیسي.
هممهاله د پاکستان مرکزي حکومت هم نیوکې کړي، چې د عمران خان په مشرۍ د ایاېسای پخواني مشر فیض حمید په ګډه دې ایالت کې د پاکستاني طالبانو غورځنګ غړي ځای پر ځای کړل او اوس په لوی سرخوږي بدل شوي دي.
همداراز په پلوچستان ایالت کې بیا د بلوڅ بېلتونپالو بریدونو هم زور اخیستی او تېرو اوونیو کې یې د پاکستاني پوځیانو پر مرکزونو د ځانمرګي بریدونو په ګډون وسلهوالې نښتې وکړې. له دې سره، څو ورځې وړاندې د اسلاماباد په یو جومات کې د داعش ډلې یوه ځانمرګي بریدګر ۴۰کسان ووژل او ۱۶۹ نور یې ټپیان کړل.
د خیبر پښتونخوا د وضعیت عادي کولو او پر امنیت د باور په خاطر، د پاکستان د کرکټ د روان کال سوپر لیګ سیالۍ په پېښور کې کیږي. دا به لومړی ځل وي چې پېښور د (پيايسايل) لوبو کوربه توب کوي.
دا پرېکړه د خیبر پښتونخوا د حکومتي او امنیتي چارواکو د یوې لوړپوړې غونډې پر مهال اورول شوې ده.
په دې ناسته کې د پاکستان، په ځانګړې توګه د خیبر پښتونخوا پر وضعیت خبرې شوې دي.
په غونډه کې د پاکستان د کورنیو چارو وزیر، د خیبر پښتونخوا اعلی وزیر، د ملي امنیت سلاکار، د پېښور قول اردو قوماندان او لوړپوړو ملکي او پوځي چارواکو ګډون درلود.
په غونډه کې پرېکړه شوې چې په مالاکنډ کې به د ایالتي پولیسو او اړوندو ادارو تر څارنې لاندې د ایالتي حکومتولۍ ماډل سملاسي عملي شي، چې وروسته به په تدریجي ډول نورو اغېزمنو ولسوالیو، په ځانګړي ډول خیبر، اورکزۍ او کورمې ته غځول کیږي.
د غونډې د پرېکړو له مخې، د پرمختیايي پروژو د اغیزناک څار او د امنیتي عملیاتو د بیا ارزونې لپاره به د اعلی وزیر په مشرۍ یوه ځانګړې فرعي کمېټه جوړیږي، چې هره میاشت به غونډې کوي.
دغه کمېټه به د حکومتولۍ او پرمختیايي نوښتونو څارنه کوي، د بدیلو کاري فرصتونو د رامنځته کولو لپاره به کار کوي او د موقتي بېځایه شویو کسانو ستونزې به اواروي.
د خیبر پښتونخوا د حکومت د اعلامیې له مخې، فدرالي او ایالتي حکومتونو په ترهګرۍ ضد جګړه کې د لا زیاتې همغږۍ او د واحدې تګلارې د خپلولو ژمنه کړې ده .
