پخواني ولسمشر حامد کرزي د عزیزي شرکت د ۸۴۵ میګاواټه لمریزې او حرارتي بریښنا د تولید پروژې د عملي چارو پیل د افغانستان لپاره د خوښۍ خبر وباله او د پروژې د پلي کولو لپاره یې له میرویس عزیزي مننه وکړه.
حامد کرزي په خپل فیسبوک پوسټ کې ویلي چې د عزیزي شرکت لهخوا د یادې بریښنا پروژې پیل به د هېواد دننه پرمختیایي چارې پر مخ بوځي او د خلکو لپاره به د کار او پرمختګ زمینه برابره کړي.
هغه ټینګار کړی چې دا ډول پروژې نه یوازې د انرژۍ بحران کموي، بلکې د ملي اقتصاد په پیاوړتیا او د ګرانو هیوادوالو د ژوند د ښه والي لپاره هم مهمه ونډه لري. کرزي د پروژې عملي کوونکي میرویس عزیزي ستایلی او د ورته پرمختیایي پروژو د دوام غوښتنه یې کړې ده.
