په ټانک ولسوالۍ کې ډرون څرخکو د پولیسو امنیتي پوستې په نښه کړې دي
د خیبر پښتونخوا د ټانک ولسوالۍ پر څو امنیتي پوستو او استوګنځایونو د بېپيلوټه الوتکو بریدونه شوي چې په پایله کې یې څو امنیتي کسان ټپیان شوي دي. ځینو وسله والو په ګومل سیمه کې د اعظم کوټ پر امنیتي پوستې د ډرون څرخکې برید کړی دی.
د ځايي پولیسو او امنیتي سرچینو په وینا، په برید کې درې کسان ټپیان شوي او روغتون ته لېږدول شوي دي.
د خراسان ډایري پاکستانۍ رسنۍ د رپوټ له مخې، په یوه بله جلا پېښه کې د سور کمر په نامه پر یوې بلې پوستې هم ډرون برید شوی، چې یو پولیس پکې ټپي شوی.
په خیبر پښتونخوا کې پوځ او وسله والې ډلې دواړه اړخونه له ډرون څرخکو کار اخلي.
