د طالبانو د اطلاعاتو او کلتور وزارت ویاند خبیب غفران وایي، د دې ډلې له بیا واکمنېدو وروسته تر ۴۰ زیاتو راډیوګانو د فعالیت جوازونه ترلاسه کړي دي. بل خوا د رسنیو ملاتړ بنسټونه وایي، چې طالبانو تر دا مهاله لږ تر لږه ۲۴ داسې فرمانونه صادر کړي چې د رسنیو پر کار مستقیم اغېز لري.
هغه دغه څرګندونې د راډیو نړیوالې ورځې په مناسبت کړي او زیاته کړې یې ده، چې دا مهال په ټول هېواد کې ۲۲۸ راډیوګانې فعالیت لري.
غفران له رسنیو غوښتي، چې د اسلامي او کلتوري ارزښتونو او د اطلاعاتو او کلتور وزارت وزارت د نشراتي پالیسۍ په پام کې نیولو سره خپلو خپرونو ته دوام ورکړي.
دا په داسې حال کې د چې د افغانستان د خبریالانو مرکز د راډیو د نړیوالې ورځې په مناسبت د یوې اعلامیې په خپرولو سره ویلي چې په ۱۴۰۰ کال کې د طالبان له بیا واک ته رسېدو وروسته، د رسنیو ازادي په ځانګړي ډول د راډیوګانو فعالیتونه سخت محدود شوي دي. ویل کېږي چې په تېرو څه باندې څلورو کلونو کې لږ تر لږه ۲۴ داسې فرمانونه او لارښوونې صادرې شوې دي چې د رسنیو پر کار مستقیم اغېز لري.
په دغو محدودیتونو کې په دولتي رسنیو کې د ښځو پر کار بندیز، د ښځو او نارینهوو د کاري چاپېریال جلا کول، د ښځو او نارینهوو ترمنځ د مرکو منع کول، د ځانګړي حجاب الزام، په ځینو ولایتونو کې د ښځو د غږ نه خپرول او په خبري غونډو کې د ښځو پر حضور محدودیتونه شامل دي.
د اعلامیې له مخې، هغه مدیران او خبریالان چې یادې لارښوونې یې نه دي عملي کړي، له ګواښ، احضار، نیونې او حتی بند سره مخ شوي دي.
په تېرو ۱۲ میاشتو کې دوه سیمهییزې ښځینه راډیوګانې له مستقیم ګواښ سره مخ شوې او دوه نورې راډیوګانې تړل شوې دي. همدارنګه، د یوې راډیو مسوول مدیر درې میاشتې زنداني شوی او یو شمېر خبریالان د بېلابېلو دلایلو له مخې نیول شوي دي.
بلخوا، د افغانستان د خبریالانو مرکز او د افغانستان د خبریالانو د ملاتړ سازمان له طالبانوغوښتي چې د رسنیو قانون ته درناوی وکړي، پر ازادو رسنیو لګول شوي محدودیتونه لرې کړي او راډیوګانو ته اجازه ورکړي چې د ژورنالېزم د بنسټیزو اصولو پر بنسټ خپلواکه او ازاده توګه فعالیت وکړي او د افغانستان د خبریالانو او رسنیو په ملاتړ کې خپلې هڅې دوامداره او لا پیاوړې کړي.
