د پاکستان د ترهګرۍ ضد ادارې اعلان کړی، چې د «اتحاد المجاهدین پاکستان» په نوم د یوې وسلهوالې ډلې لوړپوړی قوماندان نیول شوی دی. ویل کېږي دا هغه ډله ده، چې د تحریک طالبان پاکستان یا «ټيټيپي» او د ګل بهادر ډلې په همکارۍ جوړه شوې ده.
د پاکستان حکومت وایي، نیول شوی کس چې په اسامه مشهور دی اصلي نوم یې باقي دی. دغه کس لږترلږه په نهو سترو «ترهګریزو فعالیتونو» کې پر لاس لرلو اعتراف کړی دی.
د پاکستاني «ډان» ورځپاڼې د راپور له مخې؛ د یاد هېواد د ترهګرۍ ضد ادارې چارواکو ویلي، چې اسامه د یوشمېر دولتي کسانو په تښتونه او بریدونو کې هم لاس لاره. راپور زیاتوي، لومړنۍ څېړنې ښيي چې نوموړي حساسو ادارو ته نښه ټاکله او د پولیسو پرسونل انځورونه او معلومات یې «ترهګرو» ته ورکول.
چارواکي وایي، له اسامه څخه نورې پلټنې روانې دي او د هغه د ملګرو د نیولو لپاره عملیات لاهم دوام لري.
د پاکستان کورنیو چارو په برخه کې د دولت وزیر طلال چوهدري وايي، چې د تحریک انصاف ګوند بنسټګر عمران خان د سترګو د لید او اغېزمنتیا پرېکړه به وکیل نه متخصص ډاکټر کوي. نوموړي ویلي، چې عمران خان ته د درملنې اسانتیاوې پر وخت برابرېږي.
هغه د پاکستان د پارلمان مخې ته له جیونیوز سره په خبرو کې زیاته کړې، د عمران خان وکیل ته ویل شوي چې د خان روغتیایي راپور جوړ کړي. د هغه په خبره، د روغتیایي راپور جوړول د وکیل کار نه؛ بلکې د متخصص ډاکټر کار دی چې عمران ته لېږدول شوی هم دی.
نوموړي زياته کړې: «وکیل نهشي ویلی، چې سترګه یې څومره سمه ده یا څومره خرابه؛ یو متخصص ډاکټر به دغه پرېکړه کوي او متخصص ډاکټر ورلېږل شوی هم دی». چوهدري ویلي، چې تحریک انصاف اوسمهال سیاسي کارت نهلري؛ نو ځکه یې د عمران خان یاده موضوع راپورته کړې.
هغه وویل، دوی سیاسي مخالفان دي، شخصي دښمنان نه، «د پيټيای بنسټګر ته باید هغه ټول حقونه ورکړل شي، چې په قانون کې ذکر شوي دي». چوهدري دا هم ویلي، د تحریک انصاف بنسټګر ته داسي اسانتیاوي ورکول کېږي چې بل هیڅ بندي ته نه ورکول کېږي.
دا په داسې حال کې ده، چې د پاکستان تحریک انصاف ګوند د یاد هېواد د پخواني لومړي وزیر عمران خان روغتیايي وضعیت په اړه اندېښنه ښودلې او ویلي یې دي، چې د خان د ښي سترګې ۸۵ سلنه لید کم شوی دی. دغه ګوند زیاته کړې، چې خان بېړنۍ درملنې ته اړتیا لري.
له بل پلوه د پاکستان د اساسي قانون تحریک او د حکومت اپوزیسیون ویلي، چې نن د جمعې له لمانځه وروسته د پارلمان ودانۍ مخې ته احتجاجي پرلت کوي او یاد پرلت به تر هغې دوام وکړي؛ څو د عمران خان د بشپړې درملنې ډاډ ورکړل شي.
د اسراییل ۱۴شبکې د خپلو سرچینو په حواله راپور ورکړی، چې ایران او طالبانو یوه پټه «مالي او نظامي شبکه» جوړه کړې ده. د دغه راپور پر بنسټ، ایراني چارواکي د افغانستان له لارې د بیړنۍ تېښتې لپاره د یوې خوندي لارې د جوړولو او همدارنګه د طالبانو د نظامي ملاتړ جلبولو په لټه کې دي.
د دغې اسراییلي رسنۍ د راپور لهمخې، د یاد فعالیت مدیریت د ایران د بهرنیو چارو وزارت جګپوړی ډیپلوماټ محمد ابراهیم طاهریان فرد او یو مشهور افغان سوداګر کمال نبيزاده پر غاړه لري.
ابراهیم طاهریان د حسن روحاني په حکومت کې د افغانستان په چارو کې د ایران ځانګړی استازی وو او د افغان سیاستوالو په منځ کې له خورا پېژندل شویو ایراني ډیپلوماټانو شمېرل کېږي.
د اسراییل ۱۴شبکې استخباراتي سرچینو ویلي، چې طاهریان او نبيزاده د جنورۍ میاشت په لومړیو کې، په افغانستان کې له طالب چارواکو سره پټې لیدنې کړې دي.
دغې رسنۍ ادعا کړې، چې طاهریان له طالبانو سره د دوو موخو لپاره خبرې کړې دي: «لومړی، په هغه صورت کې چې ایران د خپلې بقا لپاره بهرني نظامي ملاتړ ته اړتیا پیدا کړي، د ملېشه ځواکونو جذب کې له طالبانو څخه ډاد ترلاسه کول. دویم، په افغانستان کې د ایراني چارواکو د بیړنۍ وتنې لپاره د یوې خوندي لارې جوړول».
په یاد راپور کې راغلي، ایراني چارواکي هڅه کوي، چې په افغانستان کې امریکايي وسلو او نظامي تجهیزاتو ته لاسرسی ومومي. په راپور کې ادعا شوې، چې ایران د دا ډول همکاریو په بدل کې له طالبانو سره د تېلو او ګازو د معاملې وړاندېز کړی دی.
د اسراییل ۱۴شبکې د کمال نبيزاده د پاسپورټ انځور هم خپور کړی او ادعا کوي چې نوموړي په مالي فساد کې له تورنېدو وروسته په بل نوم تازه پاسپورټ جوړ کړی او پرې افغانستان ته یې تګ راتګ هم ډېر شوی دی.
په دې وروستیو کې د امریکا د خزانې وزارت د ایران له قدس ځواک سره د تړاو په تور د کمال نبيزاده نوم د بندیزونو په نوملړ کې شامل کړ، خو د هغه دفتر دا تور سیاسي بللی دی.
دا په داسې حال کې ده، چې په کابل کې د ایران سفارت سرپرست په خپلې یوې تازه مرکه کې ویلي، چې تهران د طالبانو د ادارې د رسمیت پیژندلو په اړه د سلا مشورو په حال کې دی. نوموړي ویلي، چې د طالبانو د ادارې د په رسمیت پېژندلو پر وړاندې کوم خنډ نشته.
طالبانو، ایران او کمال نبيزاده لا تراوسه د دغې اسراییلي رسنۍ د ادعاوو په اړه څه نهدي ویلي.
درې پاکستاني ځوانان چې غوښتل یې په قاچاقي لارو ایران او بیا عراق ته لاړ شي، د لارې په اوږدو کې په ایران کې د سړې هوا له امله مړه شوي دي. پاکستاني رسنۍ وايي، د دغو درېیو ځوانانو مړي پاکستان ته لېږدول شوي او د قاچاق په تړاو یې یو کس هم نیول شوی دی.
د پاکستاني رسنیو د راپور لهمخې، دغه ۳ ځوانان چې اصغر علي، عبدالواسط او حمزه احسان نومېدل، د تېر کال په ډسمبر میاشت کې یې غوښتل په ناقانونه توګه ایران او بیا عراق ته لاړ شي، خو د لارې په اوږدو کې په ایران خاوره کې د واورې او توپان له امله مړه شوي دي.
د راپور لهمخې، اصغر علي او عبدالواسط د خپلو کورنیو له لوري تر پېژندنې وروسته خاورو ته سپارل شوي، خو د حمزه احسان کورنۍ وايي، ورسپارل شوی جسد یې زوی نهدی او له اړوندو چارواکو یې غوښتي، چې د دوی د زوی مړی یا ژوندی ورته ومومي.
له دې سره سم، د پاکستان امنیتي ادارو بیا ویلي، چې په دغې پېښه کې د ښکېلو انساني قاچاق کوونکو پر ضد لا هم عملیات روان دي او تر اوسه د احسانشاه په نوم یو انساني قاچاقبر نیول شوی دی.
د پاکستان تحریک انصاف ګوند د یاد هېواد د پخواني لومړي وزیر عمران خان د روغتیايي وضعیت په اړه ژوره اندېښنه ښودلې او ویلي یې دي، چې د خان د ښي سترګې ۸۵ سلنه لید کم شوی دی. دغه ګوند زیاته کړې، چې خان بیړنۍ درملنې ته اړتیا لري.
د پاکستان د تحریک انصاف ګوند پر رسمي اېکسپاڼې د پنجشنبې په ورځ (د سلواغې ۲۳مه) ویلي، د پخواني لومړي وزیر عمران خان د روغتیايي وضعیت په اړه اندېښمنونکي معلومات خپاره شوي او زیاته کړې یې ده، چې د عمران خان ښي سترګې ۸۵ سلنه لید له لاسه ورکړی دی.
د تحریک انصاف ګوند پر اېکسپاڼې لیکل شوي، چې د پخواني لومړي وزیر عمران خان د درملنې په برخه کې غفلت شوی او نوموړی په زندان کې بیړنۍ طبي درملنې ته اړتیا لري.
د عمران خان پلویانو پر ټولنیزو رسنیو په ځانګړي توګه پر اېکسپاڼو پراخ کمپاین پیل کړی او له نړۍوالو بشري بنسټونو یې غوښتنه کړې، چې د خان د ژوند ژغورلو لپاره پر پاکستاني چارواکو فشار ډېر کړي.
له دې سره سم، د پاکستان اپوزیسیون اعلان کړی، چې نن د جمعې په ورځ د پاکستان د پارلمان مخې ته د عمران خان د روغتیايي اندېښنو په اړه احتجاجي پرلت کوي.
شاوخوا ۵۵۰۰ داعـ.ش بندیان له سوریې څخه عراق ته لېږدول شوي او د راپورونو لهمخې، په یاده ډله کې ۲۴ افغان داعـ.شیان هم شامل دي.
العربیه شبکې د پنجشنبې په ورځ (د سلواغې ۲۳مه) راپور ورکړی، چې د امریکا، عراق او سوریې ترمنځ د شوې هوکړې پر بنسټ، له سوریې څخه عراق ته د داعش بندیانو د لېږد بهیر ترسره شوی دی. د راپور لهمخې، په یادو بندیانو کې د افغان وګړو ترڅنګ، د اروپايي هېوادونو، مرکزي اسیا، سوریې، عراق او ایران وګړي هم شامل دي.
عراقي چارواکو ویلي، چې یاد بندیان به د دغه هېواد په بېلابېلو زندانونو کې وساتل شي او دوسیې به یې د عراق په قضايي سیستم کې وڅېړل شي. د چارواکو په وینا، د ټولو بندیانو له نیمايي ډېره برخه یې سوریايي وګړي دي.
یوه عراقي چارواکي ویلي، چې د چهارشنبې تر ورځې د داعش ۵۰۴۶ بندیان د عراق خاورې ته لېږدول شوي دي. د هغه په وینا، په یادو بندیانو کې ۳۲۴۵ تنه سوریایان او ۲۷۱ عراقیان دي، همدارنګه ۲۰۸ تنه د ټونس، ۱۶۰ تنه د ترکیې، ۱۴۲ د مراکش او ۱۰۰ تنه یې مصریان دي.
امریکا تر دې وړاندې ویلي وو، چې له سوریې څخه عراق ته د داعش بندیانو د لېږد په عملیاتو کې به د داعش شاوخوا ۷۰۰۰ غړي عراق ته ولېږدوي، څو «ډاډ ترلاسه شي چې دا کسان په خوندي زندانونو کې ساتل کېږي».
د داعش یاد غړي له تېرو څو کلونو راهیسې د سوریې په شمال ختیځ کې په هغو زندانونو او نظامي کمپونو کې ساتل کېدل چې د «سوریې د ډیموکراتیکو ځواکونو» لهخوا اداره کېدل.
په راپور کې د عراق د یوه امنیتي چارواکي له قوله ویل شوي، چې ټاکل شوې د یادو بندیانو لویه برخه د «ذیقار» ولایت په ناصریه او د بغداد هوايي ډګر ته نږدې په «کرخ» زندانونو کې وساتل شي او ځینې به یې د کردستان د سلیمانیه زندانونو ته ولېږدول شي.
عراقي چاواکو د داعش یادو غړو پر محاکمه کېدو ټینګار کړی او ویلي یې دي، چې د ځینو بندیانو د دوسیو د پرانېستلو بهیر یې پیل کړی دی.