د پاکستان د پخواني لومړي وزیر او د تحریک انصاف ګوند مشر،عمران خان د وکیل په وینا، د نموړي د ښي سترګې ۸۵ سلنه بینايي له لاسه ورکړې ده. هغه له ۲۰۲۳کال راهیسې په زندان کې دی او د فساد په تور په۱۴کاله بند محکوم شوی، خو دی دا تورونه سیاسي بولي.
د هغه وکیل سلمان صفدر د پنجشنبې په ورځ د د پاکستان ستره محکمه ته په وړاندې شوي راپور کې ویلي، چې عمران خان اوس یوازې د خپلې ښي سترګې ۱۵سلنه بینايي لري. د راپور له مخې، نوموړي له اکتوبر ۲۰۲۵راهیسې د سترګې له دوامداره تتوالي او ورېځوالي شکایت درلود، خو د زندان مسوولانو پر وخت اقدام نه دی کړی.
دغه راپور وروسته له هغه خپور شو، چې د سترې محکمې په امر سلمان صفدر له عمران خان سره دوه ساعته لیدنه وکړه. محکمې اړوندو ادارو ته تر فبروري ۱۶پورې وخت ورکړی، څو نوموړي ته د خپل شخصي ډاکټر د لاسرسي زمینه برابره کړي.
د وکیل په وینا، عمران خان د خپلې بینايي د کمېدو له امله ژور خپګان درلود او د لیدنې پر مهال یې سترګې له اوښکو ډکې وې. بلخوا، د پاکستان د اطلاعاتووزیر مخکې ویلي وو، چې عمران خان د سترګې د شاوخوا ۲۰دقیقو جراحي عملیاتو لپاره روغتون ته لېږدول شوی و.
د راپور له مخې، د راولپینډۍ زندان د سترګو متخصص ډاکټر لومړنۍ معاینه ترسره کړې او وروسته عمران خان د اسلاماباد د طبي علومو انسټیټیوټ ته انتقال شوی، چېرته چې عملیات ترسره شول.
په ورته وخت کې، د پاکستان د پارلماني چارو وزیر ټینګار کړی، چې دا موضوع سیاسي نه، بلکې یوه طبي مسئله ده او حکومت به د عمران خان د روغتیا لپاره اړین ملاتړ برابر کړي. خو تحریک انصاف ګوند بیا غوښتنه کړې، چې ددوی مشر ته دې د هغه د خوښې متخصص ډاکټرانو ته بشپړ او ازاد لاسرسی ورکړل شي.
