د ریښتر په کچه ۵،۵ درجې زلزلې د بلوچستان ځینې سیمې لړزولي
د امریکا د جیولوژۍ څېړنو ادارې راپور ورکړی چې د جمعې په ورځ، د سلواغې ۲۴مه، د ریښتر په کچه ۵،۵ درجې زلزلې د پاکستان د بلوچستان ایالت ځینې سیمې ولړزولې.
د ورکړل شویو معلوماتو له مخې، دا زلزله د خضدار له سیمې څخه شاوخوا ۷۹کیلومتره واټن کې، د بلوچستان ایالت په مربوطاتو کې رامنځته شوې او ژوروالی یې د ځمکې له سطحې ۱۰کیلومتره ښودل شوی دی.
تر دې مهاله د دې زلزلې له امله د مالي زیانونو یا ځاني تلفاتو په اړه رسمي راپور نه دی خپور شوی. سیمهییزو چارواکو ویلي چې د ارزونې ډلې بېلابېلو سیمو ته استول شوې دي څو د احتمالي زیانونو کچه وڅېړي، او لومړنۍ پایلې به په راتلونکو ساعتونو یا ورځو کې اعلان شي.
په تېرو کلونو کې هم د دې سیمې په شاوخوا کې ورته زلزلې ثبت شوې دي. د کارپوهانو په وینا، د فعالو ټکتونیکي درزونو د شتون له امله د بلوچستان ایالت او شااوخوا سیمې وخت ناوخت د ځمکې لړزې تجربه کوي.
