د لاریونونو تر اعلان وروسته؛ د پاکستان حکومت په اسلاماباد کې پارلمان ته ورغلې لارې وتړلې
د پاکستان د اساسي قانون تحریک او د حکومت اپوزیسیون لهخوا د لاریونونو له اعلان وروسته د پاکستان حکومت په اسلاماباد کې پارلمان، دولتي ادارو، سترې محکمې او سفارتونو ته ورغلې ټولې لارې وتړلې. د رسنیو د معلوماتو له مخې؛ ان په دغه لاره د پارلمان غړو ته هم د تګ اجازه نه ورکول کېږي.
د پاکستان د اساسي قانون تحریک او د حکومت اپوزیسیون لهخوا د لاریونونو تر اعلان وروسته د دغه هېواد پارلمان تړل شوی او ورسره هممهاله د پارلمان دننه او بهر اضافي ځواکونه ځای پرځای شوي دي. په خپرو شویو تصویرونو کې د پارلمان مخې ته ګڼ زغرهوال ګاډي هم ښکاري.
د راپورونو له مخې؛ د اسلاماباد نورې مهمې لارې هم د تګراتګ لپاره تړل شوې او پولیس د اسمبلۍ هیڅ غړي ته د تګ اجازه نهورکوي، چې پارلمان ته ولاړ شي. پولیسو په پارلمان کې د تحریک انصاف یوشمېر غړي پر چوکونو راګرځولي او د تګ اجازه یې نهده ورکړې.
د پاکستان د اساسي قانون تحریک او د حکومت اپوزېسیون تېره ورځ ویلي و، چې د جمعې له لمانځه وروسته د پارلمان ودانۍ مخې ته احتجاجي پرلت کوي او یاد پرلت به تر هغې دوام وکړي؛ څو د عمران خان د بشپړې درملنې ډاډ ورکړل شي.
د پاکستان د ملي شورا د اپوزېسیون مشر محمودخان اڅکزي د پنجشنبې په ورځ (د سلواغې ۲۳مه) پر اېکسپاڼه لیکلي و، چې د جمعې په ورځ د پاکستان د پارلمان مخې ته احتجاجي پرلت کوي.
