د ایران د نفت وزارت د سوداګریزو چارو مرستیال سید علي محمد موسوي د طالبانو د ټرانسپورټ او هوايي چلند وزارت د ځمکني ټرانسپورټ مرستیال عبدالسلام حیدري سره لیدنه کړې. په کابل کې د ایران سفارت وایي، په ناسته کې د ایران او افغانستان ترمنځ د ټرانسپورټی ستونزو په حل خبرې اترې شوي دي.
په کابل کې د ایران سفارت نن شنبه، د سلواغې ۲۵مه پر اېکس خواله رسنۍ کې د ایراني لوري په حواله ویلي، ایران چمتو دی، چې د دواړو هېوادونو ترمنځ د سوداګریزو توکو لېږدوونکو ستونزو ته رسېدنه وکړي.
له دې وړاندې د ایران د سړکونو او ټرانسپورټ ادارې مشر رضا اکبري ویلي و، چې د ایران ـ افغانستان پر ګډه پوله د بار وړونکو لاریو ځنډ د ګمرکي اسنادو له امله نه؛ بلکې د ځایي کورنیو ادارو ترمنځ د نه همغږۍ، د کاري ساعتونو د اختلاف او د مقابل لوري د منلو د محدود ظرفیت له کبله رامنځته شوی دی.
